काठमाडौं , २७ जेठ । महानगरीय अपराध महाशाखाको टोलीले अत्याधुनिक हतियारको लाइसेन्स लिएर दुरुपयोग गर्ने ४ जनाको हतियार खोसेको छ ।

काभ्रेको उग्रचण्डी–२ का वीरेन्द्रलाल श्रेष्ठ, वाल्टिङ–४ का बलराम सापकोटा, सोलुखुम्बुको केरुङ–१ का आङ्काजी शेर्पा र मोरङको डाँगीहाट–१ का रघुनाथ पुरीको हतियार प्रहरीले बरामद गरेको हो ।

उनीहरुले हतियारको दुरुपयोग गरेको सूचना प्राप्त भएपछि सार्वजनिक शान्ति सुरक्षामा खतरा हुन सक्ने एवं कुनै पनि वेला जघन्य अपराध हुन सक्ने भएपछि जिल्ला प्रशासन कार्यालय, ललितपुरले हातहतियार खरखजाना ऐन, २०१९ को दफा ११ बमोजिम उनीहरुलाई दिएको इजाजत पत्र रद्द गरेको थियो ।

त्यसपछि महाशाखाले उनीहरुको हतियार बरामद गरेको प्रहरी वरिष्ठ उपरीक्षक एसएसपी धिरजप्रताप सिंहले जानकारी दिए ।
हतियार खोसिएका श्रेष्ठ मिटरब्याजी र ठेकेदार हुन् । पोइन्ट टुटु बन्दुकको इजाजत लिएका उनले हतियार देखाएर ठेक्का कब्जा गर्दै आएको प्रहरी स्रोत बताउँछ । त्यस्तै, बलेसँग १२ बोर र अत्याधुनिक जीएस थ्री जर्मन हतियार थियो । उनको काठमाडौंका विभिन्न क्यासिनोमा लगानी छ ।

शेर्पासँग पनि जीएसथ्री बन्दुक थियो । उनको बालुवाको ठेक्कापट्टा व्यवसाय छ । मेनपावर व्यवसायी पुरीले मेनपावरमा आउनेलाई हतियार देखाउँदै तर्साउने गरेका थिए । प्रहरीका अनुसार बरामद हतियारलाई सरकारी कोषमा दाखिला गरिनेछ ।