काठमाडौं, २५ असार । रुसमा जारी विश्वकप फुटबल अन्तर्गत मंगलबारदेखि सेमिफाइनलको खेल सुरु हुँदैछ । यसपटक सेमिफाइलनमा फ्रान्स, इंग्ल्याण्ड, बेल्जियम र क्रोयशिया पुगेकाछन् ।
फाइनल प्रवेशको लक्ष्यसहित हुने पहिलो खेलमा मंगलबार नेपाली समयअनुसार राति पौने १२ बजे फ्रान्स र बेल्जियम आमने सामने हुनेछन् । सेन्ट पिटर्सवर्ग रंगशालामा हुने खेलको विजेताले फाइनल खेल्ने छ । सन् १९९८ मा विश्वकप उचालिसकेको फ्रान्स दोस्रो पटक उपाधि चुम्ने दाउमा छ र उसलाई एम्बापे, ग्रीजम्यानजस्ता खेलाडीप्रति ठूलो भरोसा छ । पहिलो पटक उपाधिमाथि कब्जा जमाउने दाउमा रहेको बेल्जीयम रोमेलु लुकाकुप्रति ढुक्क छ । क्वार्टरफाइनलमा फ्रान्सले उरुग्वेलाई र बेल्जियमले पाँच पटकको विश्व विजेता ब्राजिललाई घर पठाएका थिए ।
बुधबार हुने दोस्रो सेमिफइनल खेलमा डिफेन्डिङ च्याम्पियन इंग्ल्याण्ड र क्रोएशिया भिँड्नेछन् । बुधबार राति नेपाली समयअनुसार पौने १२ बजे मस्कोस्थित लुज्निकी रंगशालामा दोस्रो सेमिफाइनल हुनेछ । सेमिफाइनलमा पराजित दुई टोलीले तेस्रो स्थानका लागि आगामी शनिबार सेन्ट पिटर्सवर्ग रंगशालामा नेपाली समयअनुसार साँझ पौने ८ बजे प्रतिस्पर्धा गर्नेछन् । फाइनल खेल भने आगामी आईतबार लुज्निकी रंगशालामा हुनेछ ।