तानसेन १ श्रावण । प्रधानमन्त्री कृषिआधुनिकिकरण परियोजना जोन कार्यान्वयन ईकाई (तरकारी जोन) तानसेन पाल्पाले चाल आर्थिक बर्षमा भएका कार्यक्रम, योजना तथा प्रगति विवरण सार्वजनिक गरेको छ ।

चालु आर्थिक बर्षमा तरकारी जोन कार्यालय पाल्पाले ९५.३७ प्रतिशत प्रगति हासिल गरेको जनाएको छ । तरकारी जोन परियोजनाले हाल तानसेन नगरपालिकाको १४ वटै वडा लाई तरकारीको पकेट क्षेत्र घोषणा गरी तरकारी उत्पादनमा बृद्धि गरेको छ ।

परियोजना पाल्पाले तरकारी खेतीको लागी विउ, वेर्ना, विरुवा तथा माछाको भुरामा ५० प्रतिशत अनुदान, कृषकलाई प्राविधिक सहयोग शतप्रतिशत, प्रयोगशाला सहयोग ८५ प्रतिशत, कृषि औजार तथा उपकरणमा ५० प्रतिशत, साना सिंचाईको लागी ८५ प्रतिशत, उत्पादित तरकारीको बजार व्यबस्थापनमा ८५ प्रतिशत सहयोग प्रदान गर्दै आएको परियोजना कार्यालय प्रमुख रामप्रसाद पाण्डेले बताउनु भयो ।

परियोजना अन्तरगर्त तरकारी खेतिमा हाल सम्म १ सय १२ वटा समुह निर्माण २ हजार ४ सय ३१ परिवारले काम गर्दै आएका छन । जसमा ६५ प्रतिशत महिला र ३५ प्रतिशत पुरुष रहेका छन । जातिगत रुपमा ५ प्रतिशत दलित, ४१ प्रतिशत जनजाती र ५४ प्रतिशत अन्य जातजाति रहेका छन ।

कार्यालयले यस बर्ष १०.५ मिटरका ३ सय ५० वटा प्लाष्टिक टनेल निर्माण, उच्च प्रविधीको हाईटेक टनेल ४ वटा, नमुना प्रर्दशनीको लागी अर्गली, बौघागुम्वा र दमकडामा मल्चिङ प्लाष्टिक, टनेल खेतीको नमुना प्रदर्शनी, तरकारी उत्पादक कृषकहरु लाई उत्पादनमा आधारित प्रोत्साहन रकम, तरकारी बजारीकरणको लागी ट्रक ट्याक्टर, जिप, खनजोतको लागी साना ठुला पावर टिलर जस्ता उपकरण प्रदान गरी कृषकहरुको हौसल्ला बढाउदै आएको कार्यालय प्रमुख पाण्डेले बताउनु भयो ।