बर्दिया,१० साउन । आगामि मंसिरमा नेपालगंजमा हुन लागेको आठौं राष्ट्रिय खेलकुद प्रतियोगिताका केही खेल बर्दियामा समेत हुने भएका छन् । जिल्लामा प्रतियोगीता संचालन हुने भएपछि यतीबेला खेल संचालनका लागि आवश्यक पर्ने कर्वड हल लगायत पुर्वाधार निर्माणको तयारी समेत तिब्र पारिएको छ ।

निर्माणाधिन कवर्डहलको अनुगमन गर्न बर्दिया पुगेका युवा तथा खेलकुद मन्त्री जगत बहादुर विश्वकर्माले राष्ट्रिय खेलकुद प्रतियोगीताका केही विधाहरु बर्दियामा संचालन हुने भएकोले तयारी तिब्र पारिएको बताएका छन् ।

बर्दियामा आठौं राष्ट्रिय खेलकुद प्रतियोगीताका लागि करोडौंको लागतमा अत्याधुनिक सुविधा सम्पन्न बहुआयामिक कबर्ड हल निर्माणको क्रममा रहेको बताए । मन्त्री विश्वकर्माले बर्दिया जिल्लाबाट छनौट हुँदै अन्तराष्ट्रिय स्तरमा काश्य पदक प्राप्त गर्न सफल खोखोका खेलाडीहरुलाई दोसल्लाले सम्मान गरेका छन् ।

आउँदो मंसिर २१ गते देखी २८ गते सम्म संचालित आठौं राष्ट्रिय खेलकुद प्रतियोगीताका लागि कबड्डी र खोको खेल बर्दियामा संचालन हुने निश्चित भएको छ भने अन्य खेल संचालनका लागि सम्भाब्यता अध्ययन भैरहेको खेलकुद परिषदका सदस्य सचिव केशव विष्टले जानकारी दिए ।

युवा तथा खेलकुद मन्त्री जगत बहादुर विश्वकर्मा, मन्त्रालयका सचिव, खेलकुद परिषदका सदस्य सचिव र संघका माननीय सांसद तुलसा थापा सहितको टोलीले बर्दियाको बाँसगढीमा कबड्डी खेलका लागि निर्माणाधिन कबर्ड हल, भुरिगाउँमा खोको खेलका लागि निर्माणाधिन कबर्ड हल र अन्य खेल संचालन गर्न सकिने ठाकुरद्वारा क्षेत्र र गुलरिया क्षेत्रमा फिल्ड अनुगमन गरेका छन ।