काठमाडौं, १२ साउन । कञ्चनपुरको महेन्द्रनगरमा पीडित किशोरीका हत्यारालाई कार्वाहीको माग गर्दै महिलाहरुले गरेको प्रर्दशनमा प्रहरीले हस्तक्षेप गरेको हो । प्रर्दशनमा प्रहरीले आश्रुग्यास समेत प्रहार गरेको छ ।

मृतककका आफन्तले २ घण्टा सवारी ठप्प पारेका थिए भने अहिले महेन्द्रनगर बजार पूर्णरूपमा बन्द भएको छ । जिल्ला प्रहरी कार्यालयका डिएसपी ज्ञानबहादुर सेठीका अनुसार आन्दोलनकारीले तोडफोड गर्न थालेपछि प्रहरीले हस्तक्षेप गरेको हो ।

५ जना महिलालाई पक्राउ गरिएको डिएसपी सेठीले बताए । घटनामा २ प्रहरी र केही प्रर्दशनकारी पनि घाइते भएका छन् । भीमदत्त नगरपालिका २ कि १३ वर्षीय निर्मला पन्त भीमदत्तनगर १८ निम्बुखेडाको उखुबारीमा मृत फेला परेकी थिइन ।

स्थानीय सरस्वती उच्च माविमा कक्षा ९ मा अध्ययनरत निर्मला बिहीबार ११ बजे भीनपा १८ मा रहेको साथीको घरमा होमवर्क गर्न जाने भन्दै गएकी थिइन् । पीडितका आफन्तजनले दोषीमाथि कारबहीको माग गरेका छन् ।

पीडित परिवारजनलाई उद्धृत गर्दै स्थानीय पत्रकार अम्वादत्त तिवारीका अनुसार मृतक किशोरी त्यसअघि साथीको घरमा आउनेजाने गर्दै आएकी थिइन् । तिवारीका अनुसार मृतकका आफन्तले बिहीबार साँझ नै प्रहरी चौकी भगतपुरमा उनी हराएको उजुरी दिएको भएपनि प्रहरीले ‘भोलि खोजौँला’ भनेर टारेको थियो ।

जिल्ला प्रहरी कार्यालय कञ्चनपुरका डिएपी ज्ञानबहादुर सेठीले घटनाको अनुसन्धान भइरहेको बताए । उनले भने, ‘‘उनको मृत्यु शंकास्पद देखिएको छ, बलात्कार भएको प्रारम्भीक अनुमान गरेका छौं ।’’