पोखरा । आपराधिक गतिविधिको निगरानी गर्न देशका प्रायः सहरमा सिसिटिभी क्यामरा जडान गर्ने लहर चलेको छ । तर, त्यसको उपयोगले कति आपराधिक गतिविधि नियन्त्रणमा कति सहयोग पुग्यो भन्ने सर्वसाधारणले थाहा पाएका छैनन् । सिसिटिभी क्यामरा जडान गरेपछि फाइदा लिने नागरिक नगन्य मात्रामा होलान् । तर, पोखरामा भने एक व्यक्तिले सिसिटिभीको सहायताले हराएको बहुमूल्य वस्तु प्राप्त गरेका छन् ।

आइतबार अन्यन्त्र शहरहरुमा जस्तै पोखरामा पनि दशैंको प्रभाव परेको थियो । दशैं मनाउन आउने जाने सर्वसाधरणको चहलपहल थियो । तिनैमध्ये रुमा थापा पनि दिउँसो करिब १ बजे बालबच्चा, साढे दुई तोला सुनका गरगहनासहित लत्ताकपडाले भरिएको झोलासहित ट्याक्सी चढिन् । उनी लेकसाइड पुगेपछि ट्याक्सीबाट निस्किइन् । तर, बालबच्चाका कारण झोला ट्याक्सीमै छुट्यो । उनले हत्तपत्त १०० मा फोन गरी प्रहरीलाई ट्याक्सीको हुलिया बताइन् । ट्याक्सीको अगाडिपट्टि अतिरिक्त जडान गरिएको पहेलो रङको ५ वटा बत्ति र पछाडिपट्टि बार्सिलोनाको स्टिकर टाँसिएको थियो ।

यो सूचना पाउन बित्तिकै प्रहरीले निगरानी बढायो । ट्याक्सीलाई नियन्त्रणमा लिएर सोधपुछ गर्दा ग १ ज ३९९२ नम्बरको ट्याक्सीको डिक्किमै झोला फेला परेको कास्की प्रहरी प्रमुख प्रहरी उपरीक्षक ओमबहादुर रानामगरले बताए ।  सिसि क्यामेराको सहयाताबाट बिगतमा पनि अपराधमा संलग्न व्यक्तिहरुलाई नियन्त्रणमा लिन सहयोग पुगेको प्रहरी उपरीक्षक रानाले बताए । उक्त ट्याक्सी पनि सिसिटिभि क्यामराको सहायताले नै पत्ता लगाएको उनको भनाइ छ ।

पोखरा महानगरपालिका वडा नं १५ का ट्याक्सी चालक निराजन थापालाई प्रहरीले आफुलाई प्रहरी कार्यालय ल्याउदा सम्म किन ल्याईयो भन्ने समेत थाहा नभएको बताए । जब प्रहरी कार्यालय पुगे तब ट्याक्सीको डिक्की खोलेर झोला झिकेपछि मात्र घटनाबारे थाहा भएको उनको भनाइ छ ।

ट्याक्सीमा छुटेको वस्तु पुनः पाउनेमा आशा नरहेका बेला फेला पर्दा अचम्मित भएको रुमा थापाले प्रतिक्रिया दिइन् । हराइसकेको वस्तु फेला परेपछि सिसिटिभी क्यामरोको महत्व थाहा पाएको उनको भनाइ छ ।

पोखराको अति ब्यस्त हुने चोकहरुमा जडान गरिएको सिसिटिभी क्यामेराको कारण प्रहरी काम गर्न सजिलो बनाएको छ । मख्य चोकमा मात्र राखिएको क्यामरा भित्री गल्लीहरुमो समेत विस्तार गर्न सके प्रहरीको सक्रियतालाई अझै बढी सहयोग पुग्ने देखिन्छ ।