रौतहट, १६ कार्तिक।  रौतहट जिल्लाको लाल बकैया खोलाबाट अनुमति बिना नै स्काभेटर प्रयोग गरि जथाभावी तरिकाले ढुंगा निकाल्ने काम तिब्र रुपमा भइरहेको छ । जिल्ला समन्वय समिति रौतहटको अनुमति बिना नै गुजरा नगरपालिकाले नियम विपरित रमन सगरमाथा जे.भी. कन्सट्रक्सनलाई स्काभेटर प्रयोग गरेर ढुंगा निकाल्न अनुमति दिइएको हो ।

गुजरा नगरपालिकाका नगर प्रमुख सन्तलाल चौधरीले जिल्ला समन्वय समितिबाट मौखिक रुपमा आदेश आएकोले नगरपालिकाबाट स्काभेटर प्रयोग गर्न अनुमति दिएको भन्दै आफु जोगिन खोजेका थिए । यता जिल्ला समन्वय समितिबाट कुनै अनुमति नदिएको इन्जिनियर दिपेन्द्र प्रसाद यादवले बताए ।

यादवका अनुसार निर्माण कम्पनीले अनुमतिका लागि आवश्यक कागजात पेश गरेको भएता पनि गुजरा नगरपालिकाको कार्यपालिकाको निर्णय नआएकोले समन्वय समितिबाट अनुमति नदिएको बताए । त्यसै गरी अनुमति बिना नै ढुंगा निकालेको भनेर स्थानियले रौतहटका प्रमुख जिल्ला अधिकरी गोविन्द प्रसाद रिजाल तथा रौतहट प्रहरी प्रमुख केदार ढकाललाई जानकारी गराउदा समेत उनीहरुले बेवास्ता गरेको स्थानीय बासिन्दा इश्वर प्रधानले बताए ।

प्रमुख जिल्ला अधिकारी गोविन्द प्रसाद रिजाल, प्रहरी प्रमुख केदार ढकाल र नगरपालिकाका प्रमुख सन्तलाल चौधरी ठेक्केदार कम्पनीसँग मोटो रकम लिएका कारण जिल्ला समन्वय समिति रौतहटको अनुमति तथा अनुगमन बिना नै नियम बिपरित स्काभेटर प्रयोग गरेर ढुंगा निकाल्दा पनि कार्वाही नगरेको एक जना शिक्षकले नाम गोप्य राख्ने शर्तमा बताए ।

बकैया खोलामा अनुमति बिना नै जथाभावी स्काभेटरको प्रयोग गरि ढुंगा निकाल्दै आएका कारण वर्षायाममा आउने बाढीले आफ्नो बहाव बदल्दै गाउँ नै बगाउने खतरा रहेको भए पनि नगरपालिका तथा सम्बन्धित निकायले बेवास्ता गर्ने गरेको स्थानिय बासिन्दा बिन्देश्वर पासवानले बताए ।

पासवानका अनुसार आफ्नो भएको सम्पूर्ण खेत खोलाले कटान गरेको र नदी नियन्त्रण तथा तटबन्धको लागि प्रमुख जिल्ला अधिकारीको कार्यालय र नगर प्रमुख सन्तलाल चौधरी तथा सम्बन्धित सम्पूर्ण निकाय धाउदा पनि कतैबाट राहत तथा आफ्नो कुराको सुनुवाई नभएको तर फेरी त्यही खोला माथी सबैको नजर गएको उनले बताए । लाल बकैया खोलामा वर्षेनी आउने बढीले धेरैलाई सुकुम्बासी बनाएको भएपनि अनुमति बिना नै स्काभेटर प्रयोग गरेर ढुंगा निकाल्दा समेत स्थानीय तहका जनप्रतिनिधि, प्रमुख जिल्ला अधिकारी, प्रहरी प्रमुख तथा सम्बन्धित निकाय मौन बसेकाले सबैको मिलेमत्तो रहेको स्थानीयले अाराेप लगाएका छन् ।