बुटवल, १७ फागुन । दोहोरी गीतका पारखीहरुले बुटवलमा पुरुष र पुरुष तथा महिला र महिलाका बिच दोहोरी सुन्न पाउने भएकाछन् ।
राष्ट्रिय दोहोरी गीत प्रतिष्ठानको आयोजनामा बुटवलमा १९ गते देखि सुरु हुने सांस्कृतिक महोत्सवमा पुरुष र पुरुष तथा महिला र महिला बिच पनि दोहोरी गीत प्रतियोगिता गराईने आयोजकले जनाएको छ ।

प्रतिष्ठानले आज बुटवलमा पत्रकार सम्मेलन गर्दै सांस्कृतिक महोत्सवको तयारी पुरा भएको जानकारी दिएको छ । पत्रकार सम्मेलनमा बोल्दै मुल आयोजक समितीका सह संयोजक दिपक रेउलेले महोत्सवमा देशभरीका ५० बढी समुहले प्रतियोगितामा सहभागिता जनाउने जानकारी दिनुभयो ।

आयोजकका अनुसार प्रतियोगितामा प्रथम हुनेलाई २ लाख, दोस्रो हुनेलाई १ लाख २० हजार र तेस्रो हुनेलाई ७० हजार पुरस्कार दिईने छ । महोत्सवमा ब्यवसायीक स्टलहरु राखिनुका साथै प्रदेश स्तरिय भलिबल प्रतियोगिता समेत समावेश गरिएको छ ।