राजविराज, २३ असोज ।  अगामी मंसिरमा हुने प्रतिनिधिसभा निर्वाचनका लागि नेकपा (एमाले) सप्तरीले चारवटै क्षेत्रमा उम्मेदवार टुंगो लगाएका छन् ।

प्रतिनिधि सभाका लागि सप्तरी क्षेत्र नं १ बाट सुमनराज प्याकुरेल, २ बाट रञ्जु ठाकुर, ३ बाट तारकान्त चौधरी र ४ बाट मो इस्लामको नाम सिफारिस भएको नेकपा (एमाले)ले जनाएको छ ।

यस्तै नेपाली काँग्रेस सप्तरीका सभापति दिनेशकुमार यादवको अध्यक्षतामा सम्पन्न बैठकले प्रतिनिधि सभा सदस्य र प्रदेश सभा सदस्यका लागि प्रत्यक्ष र समानुपातिकतर्फको उम्मेदवारहरुको सन्दर्भमा क्षेत्रीय समितिले सिफारिस गरी पठाएको नामावली केन्द्रमा पठाउने निर्णय भएको छ ।

नेपाली काँग्रेस सप्तरीका सचिव भूपेन्द्रनारायण यादवले आज एक प्रेश विज्ञप्ति जारी गर्दै नाम छुटेका अन्य कार्यकर्तासँग समेत सल्लाह गरी केन्द्रमा नामावली सिफारिस गरी पठाउने निर्णय सर्वसम्मतबाट गरिएको विज्ञप्तिमा उल्लेख छ ।

साथै आगामी जिल्ला समन्वय समिति निर्वाचनका लागि सम्पूर्ण पक्षसँग नेपाली काँग्रेसले वार्ताका लागि पहलसमेत गर्ने निर्णय गरेको जनाएको छ ।