काठमाडौं, ५ जेठ । भारतमा १७औं लोकसभा निर्वाचन अन्तर्गत सातै चरणको मतदान सम्पन्न भएको छ ।

केन्द्र शासित चण्डिगढसहित सात वटा राज्यका ५९ सिटका लागी आज मतदान भएपछि सन् २०१९ को लोकसभा निर्वाचनको मतदान सकिएको हो । ५ सय ४३ सिटको लोकसभामा बहुमतका लागी २ सय ७२ आवश्यक पर्छ । ६७ दशमलव ३७ प्रतिशत मतदान भएको निर्वाचनको मतगणना आगामी विहीबारबाट सुरु हुने भारतको निर्वाचन आयोगले जनाएको छ । ९० करोड भारतीय मतदाताले आफ्नो लोकतान्त्रिक अधिकारको प्रयोग गरेको लोकसभा निर्वाचन विश्वकै ठुलो निर्वाचन कार्यक्रम हो ।

यही साता भित्र अन्तिम परिणाम सार्वजनिक गर्ने भारतको निर्वाचन आयोगको तयारी छ । त्यसअघि नै भारतीय सञ्चारमाध्यममा एक्जिट पोलको निर्णय आउनेछ । गत निर्वाचनमा उल्लेख्य सिटमा जित हात पारेको सत्तारुढ भारतीय जनता पार्टीका लागी यो निर्वाचन अत्यन्त महत्वपूर्ण मानिएको छ ।