काठमाण्डौं, १३ असोज । चीनले भर्चुअल ट्रयाक बाट चल्ने स्मार्ट ट्रेनको परिक्षण यसै साता चीनको हुनान प्रान्तस्थित झुझोउ सहरमा गरेको छ । अटोनोमस रेल र्यापिङ ट्रान्जीट (एआरटी) नाम दिइएको रेललाई सिआरआरसी कर्पोरेसन लिमीटेडले बनाएको हो । विश्वकै ठुलो रेल निर्मातामध्ये एक सिआरआरसीले विश्वकै पहिलो स्मार्ट रेल निर्माणको पनि श्रेय पाएको छ ।

कम्पनीले रेलको डिजाइन सन् २०१३ मा सुरु गरेको थियो । करिब ३०० यात्रु क्षमताको रेल ७० किलोमिटर प्रतिघण्टाको दरले चल्ने र १० मिनेट चार्ज पछि २५ किलोमिटर दुरी तय गर्न सक्ने बताइएको छ । यो रेल बिना लिक भर्चुअल ट्रयाक बाट चल्छ ।

बस, ट्राम र रेलको समायोजनका रुपमा लिइएको यो रेल ३.७५ फराकिलो अदृश्य ट्र्याकमा दौडिन्छ। रेल चल्ने ट्र्याकमा रेखा कोरिएको छ ।

यस्तो रेलको अर्को फाइदा के हो भने यसको रेलमार्ग बनाउन पनि निकै सस्तो छ। यस्तो रेलमार्ग निर्माण गर्न प्रतिकिलोमिटर करिब ५ करोड युआन लाग्ने बताइएको छ। तर चीनमा ट्राम चल्ने ट्र्याक बनाउन प्रतिकिलोमिटर १५ देखि २० करोड युआन खर्च हुने गर्दछ।

हाल झुझोउ सहरको सडकमा तीन ओटा स्मार्ट ट्रेनको परीक्षण चलिरहेको छ।
अर्को वर्षदेखि औपचारिक रुपमा यो रेल सञ्चालन गरिने बताइएको छ।