काठमाडौं, १३ असार । भारतीय जनता पार्टीका विदेश विभाग इन्चार्ज डा. विजय चौथाइवालेले नेपालमा सबै दलहरूसँग कोभिड– १९ सकिएपछि राजनीतिक संवाद सुरु गर्ने बताउनुभएको छ । एमाले नेता एवं अर्थमन्त्री विष्णु पौडेलको निमन्त्रणामा गत मंसिर अन्तिम साता काठमाडौं आएका चौथाइवालेले यो प्रस्ताव नेपाली राजनीतिक नेताहरूसँग राखिसकेको र उहाँहरू संवादका लागि इच्छुक रहेको पनि उल्लेख गर्नुभएको छ । आइतबार नेपाल इन्स्टिचुट फर इन्टरनेसनल कोअपरेसन एन्ड इन्जेमेन्ट नामक थिंकट्यांकद्वारा नेपाल–भारत सम्बन्धबारे आयोजित बेविनारमा भाजपा नेता चौथाइवालेले फरक वैचारिक राजनीतिक धरातल भएका भए पनि नेपाली राजनीतिक दलहरूले भाजपासँग संवाद गर्ने इच्छा व्यक्त गरेको बताउनुभयो । ‘नेपाल र भारतबीच राजनीतिक दलहरूको तहमा लामो समयदेखि संवाद हुन सकेको छैन । पछिल्लो नेपाल भ्रमणका समयमा मैले नेपालका नेताहरूसँग छलफलमा यसबारे छलफल गरेको छु,’ चौथाइवालेले भन्नुभयो, ‘राजनीतिक छलफल र आदान–प्रदानले एक–अर्को मुलुकलाई बुझ्न, असमझदारी हटाउन मद्दत पुग्छ र यसले दुवै मुलुकलाई फाइदा हुन्छ । भाजपा नेपालका सबै पक्षसँग राजनीतिक संवाद गर्न चाहन्छ ।’ उहाँले कोभिड सकिएलगत्तै भाजपाका तर्फबाट राजनीतिक संवाद सुरु हुने पनि बताउनुभयो ।

नेपाली राजनीति भाजपा र व्यक्तिगत रूपमा आफ्ना लागि चासोको विषय भएको भन्दै चौथाइवालेले सानो राजनीतिक समूहले राजनीतिक हितका लागि भारतविरोधी भावना फैलाएको आरोप पनि लगाए । ‘नेपालमा राजनीतिक दलहरूको सानो समूह भारत आएर एउटा कुरा गर्छन्, नेपाल फर्केपछि भारतविरोधी अभिव्यक्ति दिन्छन् र भावना फौलाउँछन्,’ चौथाइवालेले कुनै व्यक्ति वा समूहको नाम नलिई भन्नुभयो, ‘त्यसले नेपाल–भारत सम्बन्धको समग्र पक्षमा फरक पर्दैन ।’ चौथाइवालेले भारतको विदेश नीतिमा नेपालको महत्वपूर्ण स्थान रहेको समेत बताउनुभयो । ‘हामी साझेदारी तथा सहकार्यमा अघि बढ्नुपर्छ,’ उहाँलेभन्नुभयो । कुनै विषयमा दुई देशबीच हुने मतभेदले समग्र सम्बन्ध प्रभावित हुन नहुने पक्षमा भारत रहेको पनि उहाँको भनाइ थियो ।
भाजपासँग वैचारिक रूपमा नेपालमा राप्रपा नजिक छ । तर, राप्रपा मूलधारको राजनीतिमा छैन । नेपालका कांग्रेस, एमाले र माओवादी केन्द्रसँग वैचारिक रूपमा निकट पार्टीहरू भारतमा कमजोर हैसियतमा छन् ।

नेपालका कांग्रेस र कम्युनिस्टहरू भारतका समाजवादी विचारधाराका जनता दल युनाइटेड, कंग्रेस राष्ट्रवादी, भाकपा माक्र्सवादीलगायतसँग नजिक छन् । भाजपा नेता चौथाइवालेले वैचारिक मतभिन्नता बाबजुत पनि नेपालका सबै पक्षसँग राजनीतिक संवाद सुरु गर्ने बताउनुभयो । अर्को प्रसंगमा नेता चौथाइवालेले भारतीय प्रधानमन्त्री नरेन्द्र मोदीको सर्वोत्तम प्राथमिकतामा नेपाल रहेको बताउनुभयो । नेपाली जनताले मोदीभन्दा बढी शुभचिन्तक भारतमा अरू नपाउने पनि उहाँको दाबी थियो । ‘हाम्रा प्रधानमन्त्रीको प्राथमिकतामा विगतमा पनि नेपाल सर्वोत्तम स्थानमा थियो, अहिले पनि उहाँको प्राथमिकतामा नेपाल छ,’ २०७१ पछि मोदीको नेपाल भ्रमणको सन्दर्भ निकाल्दै उहाँले भन्नुभयो , ‘पहिलो भ्रमणमा मोदीले नेपालको संसदमा जुन अभिव्यक्ति दिनुभयो, अहिलेसम्म कुनै पनि विदेशी नेताले त्यो स्तरको नेपालमैत्री सम्बोधन गर्नुभएको थिएन ।’

भारतीय राष्ट्रिय कंग्रेस नेतृत्वको युपिए गठबन्धनले नेपाललाई प्राथमिकता नदिएका कारण करिब दुई दशक भारतबाट नेपालमा उच्चस्तरीय भ्रमण हुन नसकेको, तर मोदी सरकारमा आउनासाथ यो अवस्था भत्किएको पनि चौथाइवालेले बताउनुभयो। , ‘युपिए शासनले नेपाललाई प्राथमिकतामा राखेन । मोदीका लागि नेपाल हिजो पनि उच्च प्राथमिकतामा थियो, आज पनि उच्च प्राथमिकतामा छ ।’ उहाँले भन्नुभयो । भारत सरकारले नेपालसँग सधैँ बलियो विकास साझेदार बन्ने चाहना राखेको, नेपालका मुख्य परियोजनाहरू निर्माण गर्न र सम्बन्ध थप सुदृढ बनाउन चाहेको पनि चौथाइवाले बताउनुभयो । ‘भारत सधैँ नेपालको निकट मित्र तथा मुख्य विकास साझेदार रहिरहनेछ, उहाँले भन्नुभयो । अर्को प्रसंगमा नेता चौथाइवालेले नेपाललाई खोपको आपूर्तिका लागि दुई देशको कूटनीतिक च्यानलमा छलफल भइरहेको पनि दावी गर्नुभयो । ‘खोपको उपलब्धता हुना साथ हामी नेपालसहित हाम्रा छिमेकीहरूलाई आपूर्ति थाल्नेछौँ,’ चौथाइवालेले भन्नुभयो ‘दुई पक्षबीच भइरहेका संवादका विषयमा म जानकार छु ।’