काठमाडौँ, २६ जेठ । महाधिवेशनमा पराजयपछि राष्ट्रिय प्रजातन्त्र पार्टीबाट अलग भएका कमल थापाले राजतन्त्रको एजेण्डा परित्याग गर्दै ‘राप्रपा नेपाल’ गठन गर्नुभयो । तर, हालै सम्पन्न स्थानीय चुनावमा उहाँको पार्टीले सामान्य उपस्थिति पनि देखाउन सकेन ।

चुनावी पराजयसँगै थापा राप्रपासँग एकताको चर्चा गर्न थाल्नु भएको छ । यदि राप्रपाले पनि राजतन्त्रको एजेण्डा त्यागेमा एकता हुन सक्ने उहाँको भनाइ छ । आज बुटबलमा आयोजित पत्रकार सम्मेलनमा उहाँले नेपालमा राजतन्त्र पुनस्स्थापना हुने सम्भावना समाप्त भएकाले आफूले यो एजेण्डा छाडेको भन्दै राप्रपालाई पनि छाड्न सुझाव दिनुभएको थियो । ‘राजेन्द्र लिङ्देनजीले राजतन्त्रको एजेण्डा छाड्नुहुन्छ भने एकता गर्नका लागि हामी जहिले पनि तयार छौं,’ थापाले भन्नुभएको छ ।

तर, राप्रपा अध्यक्ष राजेन्द्र लिङ्देन भने कुनै पनि अवस्थामा कमल थापाको पार्टीसँग आफूहरूको एकता सम्भव नरहेको बताउनुभयो । राप्रपासँग एकताको कल्पनै नगर्न उहाँले थापालाई आग्रह गर्नुभयो ।
लिङ्देनले भन्नुभयाे, ‘राजतन्त्रको मुद्दा छोडेर हिँडेको राप्रपा नेपालसँग एकताको हामीले कल्पनै गरेका छैनौं । उहाँहरूले पनि कल्पना नगर्दा हुन्छ ।’ यदि राप्रपा नेपाल पनि राजतन्त्रको एजेण्डामा आयो भने एकताको सम्भावना रहन्छ ? भन्ने प्रश्नमा लिङ्देनले भन्नुभयो, ‘त्यो पनि छलफल गर्नुपर्छ । अहिलेसम्म यो विषयमा छलफल गर्नु जरुरी ठानेका छैनौं ।’

थापाले विभाजनलगत्तै एकताको प्रसंग निकाल्नुका पछाडिको कारणबारे आफू अनभिज्ञ रहेको उहाँले बताउनुभयो । लिङ्देनले थप्नुभयो, ‘उहाँले बोल्नुभएको कुरामा म धेरै टिप्पणी गर्न चाहन्नँ । तर, राप्रपा र राप्रपा नेपालको मुख्य सिद्धान्त नै फरक भएको हुनाले एकताको कुरै भएको छैन र भविष्यमा पनि कुनै गुञ्जायस छैन ।’ यसपालीको स्थानीय चुनावमा राप्रपाले सन्तोषजनक नतिजा ल्याएको छ । अघिल्लो चुनावको भन्दा धेरै संख्यामा जित हासिल गरेपछि नेताहरू उत्साहित छन् । आगामी संसदीय चुनावमा बलियो उपस्थितिका साथ देशको चौथो शक्तिका रूपमा स्थापित हुने यस पार्टीले लक्ष्य लिएको छ ।

राप्रपा नेपालले भने स्थानीय चुनावमा नमिठो हार व्यवहोरेको थियो । भर्खरै गठन भएको पार्टीले चुनावी तयारी गर्न नभ्याएकाले यो परिणाम स्वाभाविक भएको थापाले बताउँदै आउनुभएको छ । आगामी चुनावमा नतिजा सुधारेर राष्ट्रिय पार्टीको रूपमा स्थापित हुने उहाँको दाबी छ ।