नेपालगन्ज — पश्चिम नेपालको आर्थिक र राजनीतिक केन्द्र नेपालगन्ज देशैभरि सद्भाव र एकताको शहरका रूपमा परिचित छ । मधेशी, मुस्लिम र पहाडी समुदायको बसोबास रहेको यो शहरलाई यो उपाधि दिलाउन धर्मगुरुहरूको अग्रणी भूमिका रहेको छ ।
दुई धर्मगुरु, एक मित्रता
वागेश्वरी मन्दिरका मूल महन्त चन्द्रनाथ योगी र मुस्लिम समुदायका धार्मिक गुरु मौलाना अब्दुल जब्बार मन्जरीको मित्रता नेपालगन्जको सद्भावको प्रतीक बनेको छ । उहाँहरूको सम्बन्ध अति घनिष्ठ मात्र होइन, निकै आत्मीय र प्रेमपूर्ण छ । दुवै जना सँगै घुम्नुहुन्छ, सँगै पान खान बजार जानुहुन्छ, एउटै मोटरसाइकलमा बसेर सहरका विभिन्न ठाउँ पुग्नुहुन्छ ।
उहाँहरूबिच हरेक दिन कम्तीमा एक पटक भेट हुन्छ । भेट नभएमा मोबाइलबाट भलाकुसारी हुन्छ । एक जना बिरामी पर्दा अर्कोले हालखबर बुझ्न घर पुग्नुहुन्छ । एउटाको घरमा कार्यक्रम भयो भने अर्को अनिवार्य उपस्थित हुनुहुन्छ ।
सद्भावको रक्षक
२०६३ सालमा नेपालगन्जमा तनाव फैलाउन खोजिँदा महन्त योगी र मौलाना मन्जरी सँगै उभिनुभएको थियो । त्यसपछि उहाँहरूले अन्य धर्मका गुरुलाई पनि समेटेर धार्मिक सद्भाव सञ्जाल गठन गर्नुभयो । त्यसयता सो सञ्जालले निरन्तर सद्भाव र एकताका लागि काम गर्दै आएको छ । बर्सौंदेखि आपसमा मिलेर बसेको समुदायमा फाटो ल्याएर स्वार्थको रोटी सेक्नेसँग सचेत हुँदै स्थानीयलाई सचेत र शिक्षित गराउँदै आएको छ ।
पूर्वी घटनापछिको चिन्ता
पछिल्लो समयमा सुनसरी र सिराहामा भएको दुःखद घटनाले दुवै धर्मगुरुको मन निकै दुःखी र चिन्तित बनायो । त्यसको प्रभाव नेपालगन्जमा पनि पर्ने हो कि भन्ने चिन्ताले गम्भीर बनाएको महन्त योगीले बताउनुभयो । उहाँले धार्मिक सद्भाव र्यालीमा सक्रिय सहभागिता जनाउनुभएको छ । खुट्टाको समस्याले यस पटकको र्यालीमा पुग्न नसके पनि मौलाना मन्जरीले घरबाटै फोन गरेर शान्ति र सद्भावका लागि अपिल र समन्वय गरिरहनुभएको छ ।
धर्मको सन्देश : मानवताको रक्षा
कतिपयलाई महन्त र मौलानाको दोस्ती मन परेको छैन, तर त्यसलाई बेवास्ता गर्दै महन्त योगी भन्नुहुन्छ, “हामी सँगसँगै हुँदा न त म मुस्लिम भएको छु, न त मेरो हिन्दु धर्मप्रतिको आस्था कमजोर भएको छ । न त मौलाना हिन्दु हुनुभएको छ न उहाँको पनि आस्था कमजोर भएको छ । बरु हामी दुवैले धर्मको असली सन्देश मानवताको रक्षा बुझेर अगाडि बढिरहेका छौँ ।”
प्रशासनको विश्वास
नेपालगन्जमा हुने कुनै पनि चाडपर्व वा धार्मिक समारोहअघि स्थानीय प्रशासनले महन्त योगी र मौलाना मन्जरीलाई बोलाएर शान्ति र सद्भावका लागि सहयोग गर्न आग्रह गर्छ । बाँकेका प्रमुख जिल्ला अधिकारी दिलकुमार तामाङले पूर्वी क्षेत्रको हावालाई नेपालगन्जमा पुग्न नदिन महन्त र मौलानालगायत अन्य धेरैले सकारात्मक कार्य गरिरहेको बताउनुभयो । उहाँले शान्ति भङ्ग गर्ने, सद्भाव बिगार्ने र अनावश्यक भ्रम फैलाउनेमाथि कडा निगरानी भइरहेको जनाउनुभयो ।
Originally published on abcnews.com.np.
प्रतिक्रिया दिनुहोस्