स्याङ्जा । स्याङ्जाको गल्याङ नगरपालिका–५ रुपखानीमा चितुवाको आक्रमणबाट एकै रात १० वटा बाख्रा तथा बोका मारिएका छन्।

स्थानीय श्याम रानाको घर नजिक रहेको खोरमा सोमबार राति चितुवा पसेर साना–ठूला गरी १० वटा बाख्रा तथा बोका मारेको जिल्ला प्रहरी कार्यालय स्याङ्जाले जनाएको छ।

प्रहरीका अनुसार ९ वटा बाख्रा खोरभित्रै मृत अवस्थामा फेला परेका छन् भने एउटा बाख्रा अझै भेटिएको छैन।

घटनाको जानकारी प्राप्त हुनासाथ इलाका प्रहरी कार्यालय जयपतेबाट प्रहरी टोली घटनास्थल पुगेर आवश्यक अनुसन्धान तथा वस्तुस्थिति बुझ्ने काम गरेको थियो।

जिल्ला प्रहरी कार्यालय स्याङ्जाका सूचना अधिकारी एवं डीएसपी रमेशदत्त अवस्थीले घटनाबारे थप अनुसन्धान भइरहेको जानकारी दिनुभयो।

एकै रात ठूलो संख्यामा पशुचौपाया मारिएपछि स्थानीयवासीमा त्रास फैलिएको छ। स्थानीयले वन्यजन्तुको बढ्दो जोखिम नियन्त्रणका लागि प्रभावकारी सुरक्षा व्यवस्था गर्न तथा पीडित कृषकलाई उचित क्षतिपूर्ति उपलब्ध गराउन सम्बन्धित निकायसँग माग गरेका छन्।

Originally published on abcnews.com.np.