काठमाडौँ । नेपाली कांग्रेसका सभापति गगनकुमार थापाले पार्टीको १५औँ राष्ट्रिय महाधिवेशनको कार्यतालिकामा कुनै पनि परिवर्तन नहुने बताएका छन्। आइतबार पार्टी केन्द्रीय कार्यालयमा भएको केन्द्रीय कार्यसमिति बैठकलाई सम्बोधन गर्दै सभापति थापाले आगामी असोज १६ देखि १९ गतेसम्म महाधिवेशन हुने निश्चित भएको जानकारी दिए।

थापाले पार्टी विधान र कानुन अनुसार तय गरिएको कार्यतालिका परिवर्तन गर्ने अधिकार कसैलाई नभएको बताए। उनले पार्टीको वृहत्तर एकताका लागि छुटेका नेता तथा कार्यकर्तालाई सदस्यता अद्यावधिक प्रक्रियामा सहभागी गराउन कार्यतालिकामा केही हेरफेर भएको उल्लेख गरे। ‘असोज १६–१९ गतेसम्म जुन कार्यतालिका तोकिएको छ त्यही कुरामा हुन्छ। त्यो हाम्रो अन्तिम विषय नै हो,’ थापाले भने, ‘पार्टीको बृहत्तर एकताको निम्ति छुट्नुभएका सबै नेता तथा साथीहरुलाई सदस्यता अद्यावधिक गर्ने काममा सहभागी गराउन कार्यतालिका बनाउँदै परिवर्तन गरिरहनुभएको छ। सहज बनाउँदै गर्दा केही समय लागेको छ।’

सर्वोच्च अदालतको पुनरवलोकन आदेशबारे

सभापति थापाले पार्टीको वैधानिकता र विशेष महाधिवेशनका सम्बन्धमा सर्वोच्च अदालतले दिएको पुनरवलोकन आदेशलाई सामान्य रूपमा लिएको बताए। उनले पुनः न्यायालयको सामना गर्ने भन्दै पार्टीको विधानसम्मत भएको विशेष महाधिवेशनलाई यसअघि नै निर्वाचन आयोग र सर्वोच्च अदालतले वैधानिकता दिइसकेको जानकारी दिए। ‘डराउनुपर्ने अवस्था छैन,’ थापाले भने।

Originally published on abcnews.com.np.