काठमाडौं । भारतीय इलेक्ट्रिक दुईपाङ्ग्रे सवारी निर्माता कम्पनी एथर इनर्जीले नयाँ बजेटमैत्री इलेक्ट्रिक स्कुटर ‘कोनार्क’ सार्वजनिक गर्ने तयारी गरेको छ। कम्पनीले ‘कोनार्क’ नामको नयाँ ट्रेडमार्क दर्ता गरेसँगै नयाँ स्कुटरबारे अटोमोबाइल बजारमा चर्चा बढेको हो।

आधुनिक तथा प्रिमियम फिचरयुक्त ४५० सिरिजका स्कुटरका लागि परिचित एथरले अब तुलनात्मक रूपमा कम मूल्यमा गुणस्तरीय इलेक्ट्रिक स्कुटर खोज्ने मध्यम वर्गीय ग्राहकलाई लक्षित गर्ने रणनीति लिएको देखिन्छ। कम्पनीले यसअघि आफ्नो पहिलो ‘फेमिली स्कुटर’का रूपमा रिज्टा सार्वजनिक गरेको थियो।

‘कोनार्क’ रिज्टाको नयाँ भेरियन्ट वा त्यसभन्दा कम मूल्यको छुट्टै मोडल हुन सक्ने अनुमान गरिएको छ। यो स्कुटर दैनिक सहरी यात्रा तथा पारिवारिक प्रयोगलाई केन्द्रमा राखेर विकास गरिने अपेक्षा गरिएको छ। फराकिलो सिट र पर्याप्त स्टोरेज स्पेस यसका प्रमुख विशेषता हुन सक्ने बताइएको छ।

किफायती मूल्य कायम गर्न एथरले आफ्ना प्रिमियम मोडलमा उपलब्ध केही महँगा फिचर कटौती गर्न सक्ने सम्भावना छ। टचस्क्रिन ड्यासबोर्डको सट्टा सामान्य एलसीडी डिस्प्ले तथा आधारभूत कनेक्टिभिटी फिचर प्रयोग गर्न सकिने अनुमान छ। यद्यपि, सवारीको सुरक्षा र निर्माण गुणस्तरमा भने सम्झौता नगर्ने अपेक्षा गरिएको छ।

‘कोनार्क’ले भारतमा ओला एस१ एयर, टीभीएस आईक्युब र बजाज चेतक जस्ता इलेक्ट्रिक स्कुटरसँग प्रतिस्पर्धा गर्ने अपेक्षा गरिएको छ। विशेषगरी कम मूल्यमा राम्रो रेन्ज, बलियो निर्माण र भरपर्दो प्रदर्शन खोज्ने ग्राहकलाई लक्षित गर्दै एथरले नयाँ मोडल ल्याउन लागेको देखिन्छ।

कम्पनीले ‘कोनार्क’को आधिकारिक मूल्य र सार्वजनिक गर्ने मिति भने घोषणा गरेको छैन। नेपाली बजारमा पनि एथरका स्कुटरको माग रहेकाले भारतमा सार्वजनिक भएपछि यो मोडल नेपालमा समेत आउने सम्भावना रहेको छ।

रिज्टापछि नयाँ प्रयास

एथरले ‘रिज्टा’लाई पारिवारिक प्रयोगका लागि बजारमा ल्याएको थियो। अब ‘कोनार्क’ रिज्टाकै विस्तारका रूपमा आउने हो वा छुट्टै मोडलका रूपमा बजारमा प्रवेश गर्ने हो भन्ने विषय भने अझै स्पष्ट भएको छैन।

‘कोनार्क’ नाम किन?

‘कोनार्क’ नाम भारतको प्रसिद्ध कोनार्क सूर्य मन्दिरबाट प्रेरित भएको बताइएको छ। सूर्य, शक्ति र ऊर्जासँग जोडिएको यो नामलाई एथरले आफ्नो नयाँ इलेक्ट्रिक स्कुटरका लागि प्रयोग गर्न लागेको हो।

Originally published on abcnews.com.np.