काठमाडौं — सल्यानका युवा बलदेव बस्नेत स्याङ्जाको आँधिखोलामा डुबेर बेपत्ता भएपछि उनको खोजी तथा उद्धार कार्यमा तीव्रता दिन सांसद रमेश मल्लले सरकारको ध्यानाकर्षण गराएका छन्।

सिद्ध कुमाख गाउँपालिका–२ का बस्नेत रोजगारीका लागि स्याङ्जाको गल्याङ नगरपालिका पुगेका थिए। उनी गल्याङ नगरपालिका–७ र ११ जोड्ने पुल निर्माणमा काम गर्दै आएका थिए।

सांसद मल्लका अनुसार बस्नेत आइतबार दिउँसो आँधिखोलामा डुबेर बेपत्ता भएका हुन्। उनी अझै फेला नपरेपछि परिवार चिन्तित बनेको छ।

बस्नेतले घरमा तीन वर्षीया छोरी र गर्भवती श्रीमती छोडेर रोजगारीका लागि स्याङ्जा पुगेको मल्लले बताए।

‘उहाँ गल्याङ नगरपालिका–७ र ११ जोड्ने पुल निर्माणमा काम गर्दै आउनुभएको थियो। आइतबार दिउँसोदेखि आँधिखोलामा डुबेर उहाँ बेपत्ता हुनुभएको छ,’ मल्लले भने।

आफन्त आफैं खोजीमा

बस्नेत बेपत्ता भएको खबर पाएपछि उनका आफन्त स्याङ्जा पुगेर खोजीमा जुटेका छन्। तर खोजी तथा उद्धारमा सरकारी निकाय र निर्माण व्यवसायीबाट अपेक्षित सहयोग तथा गम्भीरता नदेखिएको परिवारको गुनासो छ।

सांसद मल्लले बेपत्ता बस्नेतको खोजीमा सम्बन्धित सरकारी निकाय तथा निर्माण व्यवसायीलाई तत्काल सक्रिय हुन आग्रह गरेका छन्।

उनले खोजी तथा उद्धार कार्यलाई तीव्रता दिई बेपत्ता युवालाई सकुशल फेला पार्न आवश्यक सबै संयन्त्र परिचालन गर्न सरकारको ध्यानाकर्षण गराएका छन्।

बस्नेतको अवस्था अझै अज्ञात रहेकाले उनको परिवारमा चिन्ता बढ्दै गएको छ। स्थानीय तथा आफन्तजनले पनि खोजी कार्यलाई थप प्रभावकारी बनाउन माग गरेका छन्।

Originally published on abcnews.com.np.