काठमाडौँ । एनआईसी एसिया बैंकले आफ्ना खातावाला ग्राहकलाई राष्ट्रिय परिचयपत्र भए वा नभएको विवरण स्वघोषणा गरी आगामी २०८३ असोज मसान्तभित्र अद्यावधिक गर्न आग्रह गरेको छ।

नेपाल राष्ट्र बैंकले बैंक तथा वित्तीय संस्थाका लागि जारी गरेको एकीकृत निर्देशनमा भएको व्यवस्थाअनुसार खातावालाले आफ्नो राष्ट्रिय परिचयपत्रको विवरण भए वा नभएको स्वघोषणा गरी अद्यावधिक गर्नुपर्ने भएकाले बैंकले यस्तो आग्रह गरेको हो।

बैंकका अनुसार ग्राहकले मोबाइल बैंकिङ एप तथा बैंकको वेबसाइटमा उपलब्ध आईसर्भमार्फत सहज रूपमा राष्ट्रिय परिचयपत्रको विवरण स्वघोषणा वा अद्यावधिक गर्न सक्नेछन्। मोबाइल बैंकिङ एपमा लगइन गरी Banking Services अन्तर्गत Update NID मार्फत विवरण अद्यावधिक गर्न सकिने बैंकले जनाएको छ।

त्यसैगरी, ग्राहकले आफूलाई पायक पर्ने एनआईसी एसिया बैंकको कुनै पनि शाखा कार्यालयमा पुगेर समेत राष्ट्रिय परिचयपत्रको विवरण स्वघोषणा वा अद्यावधिक गर्न सक्नेछन्।

विदेशमा रहेका नेपालीलाई पनि आग्रह

बैंकले विदेशमा बसोबास गरिरहेका नेपाली नागरिकले विदेशमै रहेर अनलाइनमार्फत राष्ट्रिय परिचयपत्र वा राष्ट्रिय परिचयपत्र नम्बरबाहेकका आवश्यक कागजातका आधारमा बैंक खाता खोल्न सक्ने जनाएको छ।

यसरी खाता खोलेका ग्राहक नेपाल फर्किएको ३५ दिनभित्र राष्ट्रिय परिचयपत्रको विवरण अद्यावधिक गर्नुपर्ने बैंकले जनाएको छ।

बैंकले निर्धारित समयभित्र राष्ट्रिय परिचयपत्रसम्बन्धी विवरण स्वघोषणा तथा अद्यावधिक गरी बैंकिङ विवरण अद्यावधिक राख्न आफ्ना सबै ग्राहकलाई अनुरोध गरेको छ।

Originally published on abcnews.com.np.