‘पहिचानमा एकता, लगानीमा अग्रसरता र समृद्धिप्रति प्रतिबद्धता’ भन्ने मुख्य नारासहित सुरु भएको सम्मेलनमा युरोपसहित विश्वका विभिन्न मुलुकबाट एनआरएनए अभियन्ता, उद्यमी, पेसाकर्मी, विज्ञ, महिला तथा युवा नेतृत्व र दोस्रो पुस्ताका गैरआवासीय नेपाली सहभागी छन्।

‘संकल्प’ नाम दिइएको सम्मेलनको उद्घाटन गर्दै राष्ट्रिय स्वतन्त्र पार्टीका संसदीय दलका उपनेता तथा प्रतिनिधिसभा सदस्य गणेश पराजुलीले नेपालको कुल गार्हस्थ्य उत्पादन (जीडीपी) मा करिब ३० प्रतिशत योगदान रहेको एनआरएनएका माग राज्यले तत्काल सम्बोधन गर्न नसकेको स्वीकार गर्नुभयो। उहाँले एनआरएनएले पनि अपेक्षाअनुसार देखिने गरी ठोस काम गर्न नसकेको टिप्पणी गर्नुभयो।

उद्घाटन कार्यक्रममा बेलायतस्थित नेपाली दूतावासका उपनियोग प्रमुख विपिन दुवाडी र परराष्ट्र मन्त्रालयका उपसचिव कृष्णकुमार सुवेदीको समेत सहभागिता थियो। उहाँहरूले संयुक्त रूपमा पानसमा बत्ती बालेर सम्मेलनको उद्घाटन गर्नुभएको हो।

दुई दिनसम्म चल्ने सम्मेलनको अध्यक्षता एनआरएनए युरोप संयोजक रोबोट लिम्बूले गरिरहनुभएको छ। आयोजकका अनुसार सम्मेलनमा विभिन्न देशबाट करिब २ सय प्रतिनिधि सहभागी छन्।

सम्मेलनमा गैरआवासीय नेपाली नागरिकता तथा अधिकार, नेपालमा लगानी, सुरक्षित आप्रवासन, श्रम तथा आर्थिक कूटनीति, महिला सशक्तीकरण, युवा तथा दोस्रो पुस्ताको सहभागिता र ज्ञान, सीप तथा प्रविधि हस्तान्तरणलगायत विषयमा छलफल हुँदैछ।

डब्लिनस्थित रेडिसन ब्लू रोयल होटलमा भइरहेको सम्मेलनमा १० वटा विषयगत सत्र सञ्चालन हुनेछन्। सन् २०३० र त्यसपछिका वर्षमा विश्वभर रहेका नेपाली डायस्पोराको भूमिका तथा नेपालको विकासमा उनीहरूको साझेदारीका लागि साझा मार्गचित्र निर्माण गर्दै सम्मेलनले ‘डब्लिन घोषणापत्र’ जारी गर्ने आयोजकले जनाएको छ।

यसअघि एनआरएनएको १६औँ युरोप क्षेत्रीय सम्मेलन सन् २०२५ मार्च २८ देखि ३० सम्म माल्टामा आयोजना भएको थियो।