काठमाडौं । भक्तपुरको सूर्यविनायक नगरपालिका–१, विरुवास्थित उत्साहित सुधार केन्द्रमा रहेका एक व्यक्तिको शनिबार शंकास्पद मृत्यु भएपछि प्रहरीले पाँच जनालाई पक्राउ गरेको छ।

प्रहरीका अनुसार सुधार केन्द्रमा रहेका करिब ४४ वर्षीय उमेश खड्गीको मृत्यु भएको हो। घटनामा संलग्न रहेको आरोपमा प्रहरीले सिन्धुपाल्चोकका ४७ वर्षीय गौतम श्रेष्ठ, रामेछापका ३६ वर्षीय सुमन खपांगी मगर, सिन्धुपाल्चोकका ३८ वर्षीय सविन कार्की, रामेछापका अशोक तामाङ र सुर्खेतका विकास खड्कालाई पक्राउ गरेको छ।

पक्राउ परेका पाँचै जनामाथि कर्तव्य ज्यानसम्बन्धी कसुरमा अनुसन्धान अघि बढाइएको प्रहरीले जनाएको छ।

प्रहरीले पक्राउ परेका पाँचै जनालाई भक्तपुर जिल्ला अदालतबाट चार दिनको म्याद थप गरी हिरासतमा राखेको छ।

घटनाको कारण तथा मृत्युको वास्तविक अवस्था खुलिनसकेको प्रहरीले जनाएको छ। घटनाबारे थप अनुसन्धान भइरहेको र पक्राउ परेकाहरूसँग सोधपुछ तथा अन्य प्रमाण संकलनको काम भइरहेको छ।

मृतक खड्गीको शव पोस्टमार्टमका लागि पठाइएको छ। पोस्टमार्टम प्रतिवेदन प्राप्त भएपछि मृत्युको कारण तथा घटनाको प्रकृतिबारे थप तथ्य खुल्ने प्रहरीको भनाइ छ।

प्रहरीले घटनासँग सम्बन्धित अन्य पक्ष तथा सुधार केन्द्रको व्यवस्थापन र त्यहाँको गतिविधिबारे समेत आवश्यक अनुसन्धान अघि बढाएको जनाएको छ। हालसम्म घटनाको विस्तृत विवरण सार्वजनिक गरिएको छैन।

Originally published on abcnews.com.np.