बागलुङ । अदालतबाट दोषी ठहर भई सजाय तथा जरिवाना भुक्तानी गर्न बाँकी रहेका पाँच जना फरार प्रतिवादीलाई प्रहरीले पक्राउ गरेको छ।

जिल्ला प्रहरी कार्यालय बागलुङ तथा मातहतका प्रहरी युनिटबाट परिचालित टोलीले उनीहरूलाई विभिन्न स्थानबाट पक्राउ गरेको हो।

पक्राउ पर्नेमा झुटा विवरण पेस गरी दोहोरो नागरिकता लिएको मुद्दामा गलकोट नगरपालिका–६ चरौदीका २५ वर्षीय पवन गौतम (प्रमोद), ७७ वर्षीय अणदत्त गौतम र ५० वर्षीय भविन्द्र गौतम रहेका छन्।

जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक रामेश्वर त्वातीले उनीहरू पक्राउ परेको जानकारी दिए।

त्यस्तै, घरेलु हिंसा मुद्दामा गलकोट नगरपालिका–९ बास्खोलाका ४५ वर्षीय लालबहादुर दर्जी र चेक अनादर मुद्दामा बरेङ गाउँपालिका–२ हुग्दिशिरका भिमबहादुर श्रीसलाई पनि प्रहरीले पक्राउ गरेको छ।

पक्राउ परेका सबैलाई जरिवाना असुली तथा बाँकी कैद भुक्तानीका लागि बागलुङ जिल्ला अदालतमा उपस्थित गराइएको प्रहरीले जनाएको छ।

प्रहरी नायब उपरीक्षक त्वातीका अनुसार संयुक्त विशेष अप्रेसन सञ्चालन गरी फरार प्रतिवादीहरूलाई पक्राउ गरिएको हो। अदालतको फैसला कार्यान्वयनलाई चुस्त, दुरुस्त र प्रभावकारी बनाउँदै न्याय सम्पादनलाई पूर्णता दिने उद्देश्यले अभियान सञ्चालन गरिएको उनले बताए।

फैसला कार्यान्वयनमा प्रहरीको सक्रियता

प्रहरीले अदालतबाट दोषी ठहर भई सजाय तथा जरिवाना भुक्तानी गर्न बाँकी रहेका फरार प्रतिवादीको खोजी तथा पक्राउ अभियानलाई तीव्र बनाएको जनाएको छ।

अभियानअन्तर्गत विभिन्न स्थानमा खोजतलास गरी पक्राउ गरिएका प्रतिवादीलाई अदालतमा उपस्थित गराई फैसला कार्यान्वयनको प्रक्रिया अघि बढाइएको प्रहरीले जनाएको छ।

Originally published on abcnews.com.np.