काठमाडौं । बाँदर र बँदेलको आतंक नियन्त्रणका लागि दीर्घकालीन समाधान खोज्दै एकीकृत राष्ट्रिय कार्ययोजना बनाउन मागसहित प्रतिनिधिसभामा जरुरी सार्वजनिक महत्त्वको प्रस्ताव दर्ता भएको छ।

नेपाली कांग्रेसका सांसद नरेन्द्रकुमार केरुङ प्रस्तावक रहेको उक्त प्रस्तावमा नेकपा एमालेकी सचेतक निता घतानी, नेपाली कम्युनिस्ट पार्टी (नेकपा) की सांसद पार्वती विक र श्रम संस्कृति पार्टीका सांसद आरेन राई समर्थक छन्।

प्रस्तावमा बाँदर र बँदेलका कारण किसानको उत्पादन, आम्दानी, खाद्य सुरक्षा तथा ग्रामीण जीविकोपार्जनमा प्रत्यक्ष असर परिरहेको उल्लेख गरिएको छ।

बाँदर र बँदेलको समस्या मानव–वन्यजन्तु द्वन्द्वमा मात्र सीमित नरहेको भन्दै यसको दीर्घकालीन समाधानका लागि राज्यको स्पष्ट नीति आवश्यक रहेको प्रस्तावमा उल्लेख छ।

प्रस्तावक केरुङले बाँदर तथा जंगली बँदेल व्यवस्थापनका लागि समयसीमा र आवश्यक बजेटसहित संघ, प्रदेश तथा स्थानीय तहको जिम्मेवारी स्पष्ट हुने गरी राष्ट्रिय कार्ययोजना बनाउन सरकारसँग माग गरिएको बताए।

किसानको उत्पादन र जीविकोपार्जनमा भइरहेको क्षति रोक्न तत्काल प्रभावकारी कदम चाल्नुपर्ने उनको भनाइ छ।

Originally published on abcnews.com.np.