काठमाडौँ विश्वविद्यालय (केयू)ले केही दिनमै नयाँ उपकुलपति पाउने भएको छ। उपकुलपति नियुक्तिका लागि शिक्षा तथा खेलकुदमन्त्री सस्मित पोखरेलको नेतृत्वमा गठित छनोट समितिले तीन जनाको नाम सिफारिस गरेको छ।
समितिले सिफारिस गरेका नाम सोमबार केयूका कुलपति एवं प्रधानमन्त्री वालेन्द्र शाहसमक्ष पठाइएको शिक्षा मन्त्रालयले जनाएको छ। अब प्रधानमन्त्री शाहले सिफारिस गरिएका तीनमध्ये एक जनालाई उपकुलपतिमा नियुक्त गर्नेछन्।
शिक्षा मन्त्रालय स्रोतका अनुसार उपकुलपतिका लागि तीन जनाको नाम टुंगो लगाएर प्रधानमन्त्रीको कार्यालय पठाइसकिएको छ। प्रधानमन्त्रीले अध्ययन गरेपछि केही दिनमै नियुक्ति गर्ने सम्भावना रहेको स्रोतको भनाइ छ।
छनोट समितिले बालचन्द्र लुईटेल, विवेक बराल र विकास नकर्मीको नाम सिफारिस गरेको हो। लुईटेल र बराल काठमाडौँ विश्वविद्यालयमै कार्यरत छन् भने नकर्मी चीनको नान्चिङ युनिभर्सिटी अफ एरोनटिक्स एन्ड एस्ट्रोनोटिक्समा प्राध्यापनरत छन्।
अध्यादेशमार्फत उपकुलपति हटाइएपछि नयाँ प्रक्रिया
सरकारले गत वैशाखमा अध्यादेशमार्फत केयूका तत्कालीन उपकुलपति अच्युत वाग्लेलाई पदबाट हटाएको थियो। त्यसपछि जेठ १९ गते बसेको केयू सभाले शिक्षामन्त्री पोखरेलको संयोजकत्वमा उपकुलपति छनोट समिति गठन गरेको थियो।
समितिमा केयूका पूर्वउपकुलपति प्रा.डा. सुरेशराज शर्मा र राष्ट्रिय योजना आयोगका शिक्षा हेर्ने सदस्यसमेत सहभागी छन्।
३५ आवेदन, १० जनाको अल्पसूची
उपकुलपति छनोट समितिले असार ३ गते आवेदन आह्वान गरेको थियो। उपकुलपति पदका लागि ३५ जनाले आवेदन दिएका थिए।
प्राप्त आवेदनमध्ये समितिले १० जनालाई अल्पसूचीमा राखेको थियो। अल्पसूचीमा दयाराम पोखरेल, निरञ्जन पराजुली, बालचन्द्र लुईटेल, विकास नकर्मी, विमप्रसाद श्रेष्ठ, राजेन्द्र जोशी, विवेक बराल, शेषानन्द सञ्जेल, सुबोध शर्मा र हरिप्रसाद न्यौपाने थिए।
समितिले साउन २२ गते अल्पसूचीमा परेका उम्मेदवारसँग अन्तर्वार्ता लिएको थियो। तर निरञ्जन पराजुली भने अन्तर्वार्तामा सहभागी भएनन्।
‘काठमाडौँ विश्वविद्यालयको उपकुलपति छनोट तथा सिफारिससम्बन्धी कार्यविधि, २०८३’ बमोजिम छनोट प्रक्रिया अघि बढाइएको थियो। सोही प्रक्रियाबाट अन्तर्वार्तामा सहभागी नौ जनामध्ये तीन जनाको नाम उपकुलपतिका लागि सिफारिस गरिएको हो।
को हुन् तीन प्रतिस्पर्धी?
प्रा.डा. बालचन्द्र लुईटेल
लुईटेल केयूको स्कूल अफ एजुकेशनका डीन हुन्। उनले त्रिभुवन विश्वविद्यालयबाट गणितमा स्नातकोत्तर तथा अस्ट्रेलियाको कर्टिन विश्वविद्यालयबाट गणितमै विद्यावारिधि गरेका छन्। सन् १९९८ देखि केयूमा अध्यापन तथा प्राज्ञिक गतिविधिमा संलग्न उनी सांस्कृतिक रूपमा सान्दर्भिक गणित तथा विज्ञान शिक्षाको विकासमा काम गर्दै आएका छन्।
उनी राष्ट्रिय शिक्षा पुरस्कार, युवा वैज्ञानिक पुरस्कार र गणितीय विज्ञान पुरस्कारबाट सम्मानित भइसकेका छन्।
प्रा.डा. विवेक बराल
बराल केयूको मेकानिकल इन्जिनियरिङ विभागका प्राध्यापक हुन्। उनले न्यूजिल्यान्डको अकल्यान्ड विश्वविद्यालयबाट मेकानिकल इन्जिनियरिङमा विद्यावारिधि गरेका छन्। उनी केयू प्राध्यापक संघका पूर्वसभापतिसमेत हुन्।
उनले धुलिखेल र विराटनगरका परम्परागत तथा आधुनिक घरको तापक्रम व्यवस्थापन, ऊर्जा खपत र इन्डोर थर्मल कम्फर्टलगायतका विषयमा अध्ययन गरेका छन्। ब्याट्री कुलिङ, नानोफ्लुइड्स तथा विद्युतीय सवारीसाधनको थर्मल म्यानेजमेन्टसम्बन्धी अनुसन्धानमा समेत उनी संलग्न छन्।
प्रा.डा. विकास नकर्मी
नकर्मी पेशाले इन्जिनियर हुन्। उनले दक्षिण कोरियाको कोरिया एड्भान्स्ड इन्स्टिच्युट अफ साइन्स एन्ड टेक्नोलोजी (KAIST) बाट अप्टिकल कम्युनिकेसन एन्ड नेटवर्कमा विद्यावारिधि गरेका छन्।
माइक्रोवेभ फोटोनिक्स, फोटोनिक रडार, सिलिकन फोटोनिक्स र अप्टिकल कम्प्युटिङलगायतका क्षेत्रमा अनुसन्धानरत नकर्मी हाल चीनको नान्चिङ युनिभर्सिटी अफ एरोनटिक्स एन्ड एस्ट्रोनटिक्समा प्राध्यापनरत छन्।
अब तीनमध्ये कसले काठमाडौँ विश्वविद्यालयको नेतृत्व सम्हाल्ने भन्ने निर्णय प्रधानमन्त्री तथा कुलपति शाहले गर्नेछन्।
Originally published on abcnews.com.np.
प्रतिक्रिया दिनुहोस्