वीरगन्ज। प्रहरीले वीरगन्जबाट १६.५७ ग्राम ब्राउनसुगरजस्तो देखिने लागुऔषधसहित एक भारतीय नागरिकलाई पक्राउ गरेको छ।

वीरगन्ज महानगरपालिका–१४ स्थित कृष्णप्रणामी चोकमा लागुऔषधको खरिद–बिक्री भइरहेको सूचनाका आधारमा जिल्ला प्रहरी कार्यालय पर्सा र लागुऔषध नियन्त्रण ब्युरो वीरगन्जबाट खटिएको संयुक्त टोलीले भारतको बिहार, मोतीहारी श्रीपुर ग्रामपञ्चायत–१ निवासी २५ वर्षीय शत्रुधन पासवानलाई पक्राउ गरेको हो।

जिल्ला प्रहरी कार्यालय पर्साका प्रहरी नायब उपरीक्षक एवं प्रवक्ता चक्रबहादुर मल्लका अनुसार शंकास्पद रूपमा पैदल हिँडिरहेका पासवानलाई रोकेर खानतलासी गर्दा उनको पाइन्टको खल्तीबाट ब्राउनसुगरजस्तो देखिने पदार्थ फेला परेको थियो।

प्रहरीले उक्त पदार्थको तौल गर्दा १६.५७ ग्राम रहेको जनाएको छ। पदार्थसहित पासवानलाई नियन्त्रणमा लिएर लागुऔषधसम्बन्धी कसुरमा थप अनुसन्धान अघि बढाइएको प्रहरीले जनाएको छ।

पक्राउ परेका व्यक्तिको संलग्नता, लागुऔषधको स्रोत तथा कारोबारमा अन्य व्यक्तिको संलग्नताबारे अनुसन्धान भइरहेको प्रहरीले जनाएको छ।

Originally published on abcnews.com.np.