वासिङ्टन डीसी । अमेरिकी अदालतले भारतीय अर्बपति उद्योगपति गौतम अदानीविरुद्ध चलिरहेको घुसखोरी तथा ठगीसम्बन्धी मुद्दा औपचारिक रूपमा खारेज गरेको छ।

ट्रम्प प्रशासनले अदानीविरुद्धको अभियोजन अघि नबढाउने निर्णय गरेपछि ब्रुकलिनका सङ्घीय न्यायाधीश निकोलस गाराउफिसले अभियोजकहरूको मुद्दा खारेज गर्ने अनुरोध स्वीकृत गरेका हुन्।

अदालती अभिलेखअनुसार अमेरिकी अभियोजकहरूले गत मेमा सन् २०२४ मा भारतीय अधिकारीलाई २६ करोड ५० लाख अमेरिकी डलर घुस दिने योजनामा अदानी संलग्न रहेको आरोप खारेज गर्न अनुरोध गरेका थिए। उक्त घुस भारतीय अधिकारीबाट आकर्षक सौर्य ऊर्जा आपूर्ति सम्झौता प्राप्त गर्ने उद्देश्यले प्रस्ताव गरिएको आरोप थियो।

मुद्दा खारेज गर्ने प्रक्रियामा न्यायाधीश असन्तुष्ट

मुद्दा खारेज गर्ने निर्णयप्रति न्यायाधीश गाराउफिसले भने असन्तुष्टि जनाएका छन्।

उनले ट्रम्प प्रशासनका डेपुटी एसोसिएट अटर्नी जनरल ट्रेन्ट म्याककोटरले मुद्दा खारेज गर्ने निर्णयमा अनुसन्धानकर्ता तथा अभियोजकबाट पर्याप्त सुझाव नलिएको विषयलाई असामान्य बताएका छन्।

अदालतको आदेशमा म्याककोटरले प्रतिरक्षा पक्षका वकिलसँग सहकार्य गरेर निर्णयमा पुगेको देखिनु तथा एफबीआई, अमेरिकी धितोपत्र तथा विनिमय आयोग (एसईसी) का अधिकारी र मुद्दा अघि बढाउने अभियोजकबाट आवश्यक जानकारी नलिनु असामान्य रहेको उल्लेख गरिएको छ।

१० अर्ब डलर लगानीको प्रतिबद्धता

यसअघि अमेरिकी सञ्चारमाध्यमले अदानीका वकिल रोबर्ट गिफ्राले अप्रिलमा अमेरिकी न्याय मन्त्रालयका अधिकारीसँग आरोप हटाइएमा अदानीले अमेरिकी अर्थतन्त्रमा १० अर्ब अमेरिकी डलर लगानी गर्न इच्छुक रहेको बताएका थिए।

अदानीका वकिल गिफ्रा राष्ट्रपति डोनाल्ड ट्रम्पका निजी वकिलसमेत हुन्।

मुद्दाका न्यायाधीशले अदानी पक्षबाट गरिएको भनिएको लगानी प्रतिबद्धता अभियोजन खारेज गर्ने निर्णयको कारण बनेको थियो कि थिएन भन्ने विषयमा समेत प्रश्न उठाएका थिए। तर अन्ततः न्यायाधीश गाराउफिसले उक्त लगानी प्रतिबद्धता अभियोजन खारेज गर्ने निर्णयको आधार नभएको निष्कर्ष निकाले।

अदानीले गरे अदालतको निर्णयको स्वागत

अदानीले मुद्दा खारेज भएपछि अमेरिकी अदालतको निर्णयको स्वागत गरेका छन्। उनले सामाजिक सञ्जालमार्फत अदालतको निर्णयलाई सम्मान गर्दै चुनौतीपूर्ण अवधिमा सत्य, निष्पक्षता र विधिको शासनप्रतिको आफ्नो विश्वास कायम रहेको बताएका छन्।

अमेरिकी अभियोजकहरूले सन् २०२४ मा अदानी र उनीसँग सम्बन्धित व्यक्तिहरूमाथि भारतमा सौर्य ऊर्जा परियोजनाको सम्झौता प्राप्त गर्न अधिकारीलाई घुस दिने योजना बनाएको आरोप लगाएका थिए। उनीहरूमाथि लगानीकर्तालाई भ्रममा पार्ने तथा अमेरिकी वित्तीय बजारसम्बन्धी कानुन उल्लङ्घन गरेको आरोपसमेत लगाइएको थियो।

अदानी समूह भारतका ठूला व्यापारिक समूहहरूमध्ये एक हो। समूहले बन्दरगाह, विद्युत्, सिमेन्ट, ऊर्जा तथा सञ्चारमाध्यमलगायत क्षेत्रमा व्यवसाय सञ्चालन गर्दै आएको छ।

यसअघि अदानी कम्पनीका शेयर मूल्यमा ठूलो गिरावट तथा कर्पोरेट ठगीसम्बन्धी आरोपका कारण विवादमा आएका थिए। अमेरिकी अदालतको पछिल्लो निर्णयसँगै उनीविरुद्ध अमेरिकामा चलिरहेको उक्त आपराधिक अभियोजन औपचारिक रूपमा अन्त्य भएको छ।

Originally published on abcnews.com.np.