काठमाडौं । नेता शशांक कोइरालाको किर्ते हस्ताक्षरसहित नेपाली कांग्रेसको राष्ट्रिय भेला स्थगित भएको सूचना सार्वजनिक भएपछि कांग्रेस संस्थापनइतर पक्षले आपत्ति जनाएको छ।

साउन २९ देखि ३१ गतेसम्म काठमाडौंमा आयोजना गर्न लागिएको राष्ट्रिय भेला अर्को सूचना नआएसम्मका लागि स्थगित भएको भन्दै कोइरालाको हस्ताक्षरमा विज्ञप्ति सार्वजनिक भएको थियो।

तर, नेता मीन विश्वकर्माले उक्त विज्ञप्ति फर्जी भएको दाबी गरेका छन्। उनले राष्ट्रिय भेला पूर्वनिर्धारित कार्यक्रमअनुसार नै हुने स्पष्ट पारेका छन्।

विश्वकर्माका अनुसार कांग्रेसको आधिकारिकतासम्बन्धी मुद्दामा अदालतले पुनरावलोकनको आदेश दिएपछि संस्थापन पक्ष हतास मानसिकतामा यस्तो गतिविधिमा लागेको हो।

उनले किर्ते हस्ताक्षरसहित नक्कली विज्ञप्ति जारी गरिएको भन्दै यस्ता गतिविधि नगर्न र नगराउन चेतावनी दिएका छन्।

विश्वकर्माले जारी गरेको विज्ञप्तिमा भनिएको छ, “अदालतबाट मुद्दाको पुनरावलोकन गर्ने आदेश आइसकेपछि डराएको हतास मनस्थितिको उपजको रूपमा कार्यक्रमबारे जथाभाबी लेखेर संयोजकको किर्ते हस्ताक्षर गरी तथाकथित, नक्कली, किर्ते विज्ञप्ति जारी गरेको पाइएकोले गम्भीर आपत्ति व्यक्त गर्दै त्यस्ता गतिविधि कसैले नगर्न नगराउन सचेत गराउँदछौँ।”

कांग्रेस संस्थापनइतर पक्षले राष्ट्रिय भेला साउन २९ देखि ३१ गतेसम्म काठमाडौंमा हुने जनाएको छ। नेता विश्वकर्माले भेला स्थगित भएको भन्दै सार्वजनिक भएको सूचनाबाट भ्रमित नहुन आग्रह गरेका छन्।

Originally published on abcnews.com.np.