काठमाडौं । वरिष्ठ कलाकार मदनकृष्ण श्रेष्ठको जीवनमा आधारित बन्न लागेको चलचित्र ‘म मदनकृष्ण’ मा अभिनेत्री वर्षा राउत अनुबन्धित भएकी छन्। निर्देशक मिलन चाम्सका अनुसार वर्षाले चलचित्रमा अभिनेता हरिवंश आचार्यकी पत्नी रमिला पाठकको भूमिका निर्वाह गर्नेछिन्।

चलचित्रमा हरिवंश आचार्यको भूमिकाका लागि अभिनेता अरुण क्षेत्री यसअघि नै छनोट भइसकेका छन्। अरुण र वर्षाले पहिलोपटक यही चलचित्रमार्फत पर्दामा सहकार्य गर्न लागेका हुन्।

निर्देशक चाम्सले अरुणको जोडीका रूपमा वर्षालाई चयन गरिएको जानकारी दिँदै चलचित्रमा उनी हरिवंशकी पत्नीको भूमिकामा प्रस्तुत हुने बताए।

हरिवंशको बायोपिकमा पनि उही जोडी

निर्देशक चाम्सले यसै वर्ष निर्माण हुने हरिवंश आचार्यको जीवनीमा आधारित अर्को चलचित्रमा पनि वर्षा राउतले रमिला पाठककै भूमिका निर्वाह गर्ने जानकारी दिएका छन्। हरिवंशको भूमिकाका लागि अरुण क्षेत्रीले सम्झौता गरिसकेकाले दुवै चलचित्रमा उनीहरू एउटै जोडीका रूपमा देखिने भएका हुन्।

वर्षा पछिल्लो समय चलचित्र ‘मालती मंगले’ बाट दर्शक तथा समीक्षकबाट प्रशंसा पाउन सफल भएकी थिइन्।

मदनकृष्णको भूमिकामा महेश त्रिपाठी

मिलन चाम्सको निर्देशनमा बन्न लागेको ‘म मदनकृष्ण’मा मदनकृष्ण श्रेष्ठको भूमिकामा अभिनेता महेश त्रिपाठी देखिनेछन्। त्यस्तै, मदनकृष्णकी पत्नी यशोदाको भूमिकामा अभिनेत्री केकी अधिकारी रहनेछिन्।

चलचित्रमा राजाराम पौडेल, किरण केसी, रुषा न्यौपाने, यमन श्रेष्ठ र देशभक्त खनाललगायत कलाकारको पनि अभिनय रहनेछ।

संघर्षदेखि मह जोडीसम्मको यात्रा

चलचित्रले मदनकृष्ण श्रेष्ठको बाल्यकालदेखि सरकारी जागिरे जीवन हुँदै कलाकारितामा स्थापित हुँदासम्मका विभिन्न घटनाक्रमलाई समेट्ने निर्माण पक्षले जनाएको छ।

मदनकृष्ण र हरिवंश आचार्यबीचको सहकार्य, उनीहरूको ‘मह जोडी’ यात्राका विभिन्न पाटो, व्यक्तिगत संघर्ष, सुख–दुःख, आरोह–अवरोह तथा मदनकृष्णको अन्तरजातीय विवाहलगायतका घटनालाई पनि चलचित्रमा प्रस्तुत गरिनेछ।

निर्देशक चाम्सले यसअघि राष्ट्रिय महिला फुटबल टोलीकी गोलरक्षक तथा कप्तान अञ्जिला तुम्बाप्पेको जीवनमा आधारित चलचित्र ‘अञ्जिला’ निर्देशन गरेका थिए।

Originally published on abcnews.com.np.