काठमाडौं । नेकपा (एमाले)का नेता महेश बर्तौलाले नवनिर्वाचित प्रतिनिधि सभाको कार्यकाल सुरु भएको चार महिनामै गणपूरक संख्या नपुगेर बैठक स्थगित हुनुलाई लज्जास्पद घटना भएको बताएका छन्।

बुधबार सामाजिक सञ्जालमार्फत धारणा सार्वजनिक गर्दै बर्तौलाले सांसदहरू संसदीय कामकारबाहीप्रति उदासीन र गैरजिम्मेवार बनेको आरोप लगाए।

मंगलबार साँझ गणपूरक संख्या नपुगेपछि प्रतिनिधि सभाको बैठक स्थगित भएको घटनाप्रति टिप्पणी गर्दै उनले यो सामान्य घटना नभएको बताएका छन्।

‘नवनिर्वाचित संसद्को कार्यकाल प्रारम्भ भएको चार महिनामै संसद्को बैठकमा गणपूरक संख्या नपुगेर प्रतिनिधि सभाको बैठक नै रोक्नुपर्ने अवस्था सिर्जना हुनुले संसदीय कामकारबाहीप्रति सांसदहरूको उदासीनता र गैरजिम्मेवारीपन उजागर भएको छ,’ उनले भनेका छन्।

संविधानअनुसार प्रतिनिधि सभामा कुनै प्रस्ताव निर्णयार्थ प्रस्तुत गर्दा कम्तीमा एक चौथाइ अर्थात् ६९ सांसद उपस्थित हुनुपर्ने व्यवस्था छ। तर सत्तारुढ राष्ट्रिय स्वतन्त्र पार्टी (रास्वपा) का १८१ सांसद हुँदाहुँदै गणपूरक संख्या नपुग्नु गम्भीर विषय भएको बर्तौलाको भनाइ छ।

‘सत्तारुढ रास्वपाका १८१ सांसद हुँदाहुँदै आफ्नै सरकारले ल्याएको प्रस्ताव गणपूरक संख्याको अभावमा निर्णयार्थ पेस हुन नसकी बैठक समाप्त हुनु सामान्य घटना मात्रै होइन, भयंकर संसदीय लज्जाको विषय हो,’ उनले भनेका छन्।

बर्तौलाले यस घटनाले विशेषगरी सत्तारुढ दलका सांसदहरूको संसदीय जिम्मेवारीप्रतिको बेवास्ता उजागर गरेको दाबी गरेका छन्।

सरकारी प्रस्तावलाई संसद्बाट निर्णयमा पुर्‍याउने दायित्व सरकारकै भएको स्मरण गराउँदै उनले भनेका छन्, ‘सरकार आफ्नै, बहुमत आफ्नै, विधेयक आफ्नै तर दुर्भाग्य संसद्मा आफ्नै सांसद छैनन्।’

चार महिनामै देखिएको यस्तो अवस्थाले सत्तारुढ रास्वपाको संसदीय गम्भीरता, अनुशासन र जिम्मेवारीबोधमाथि प्रश्न उठाएको उनको टिप्पणी छ।

बर्तौलाले संसद्को प्रभावकारिता र जनविश्वासमा असर पर्न नदिन रास्वपा तथा सरकारलाई समयमै गम्भीर भएर ध्यान दिन आग्रह गरेका छन्।

‘समयमै ध्यान पुग्नु जरुरी छ, नत्र संसद्प्रतिको जनविश्वासमा गम्भीर क्षति पुग्ने देखिन्छ,’ उनले भनेका छन्।

Originally published on abcnews.com.np.