काठमाडौं । गृह मन्त्रालयले पहाडी क्षेत्रका नौ जिल्लामा सहसचिवस्तरीय प्रमुख जिल्ला अधिकारी (सीडीओ) को दरबन्दी कटौती गरेको छ। नयाँ संगठन तथा व्यवस्थापन सर्वेक्षण (ओएन्डएम) अनुसार ती जिल्लामा अब उपसचिवलाई प्रमुख जिल्ला अधिकारीका रूपमा खटाइने भएको हो।
गृह मन्त्रालयका प्रवक्ता आनन्द काफ्लेका अनुसार भोजपुर, खोटाङ, सल्यान, जाजरकोट, जुम्ला, रोल्पा, बैतडी, डडेल्धुरा र अछाममा अब उपसचिवस्तरीय सीडीओ रहनेछन्। त्यस्तै, गौतम बुद्ध अन्तर्राष्ट्रिय विमानस्थल, भैरहवामा पनि उपसचिव खटाउने निर्णय भएको छ।
यससँगै देशभरका ७७ जिल्लामध्ये अब ५२ जिल्लामा मात्रै सहसचिवस्तरीय प्रमुख जिल्ला अधिकारी रहनेछन्। यीमध्ये केही जिल्लामा यसअघि नै उपसचिव सीडीओका रूपमा कार्यरत थिए भने पछिल्लो समय सहसचिव खटाउने निर्णय गरिएको थियो।
लागुऔषध नियन्त्रण विभाग गठन
गृह मन्त्रालयले लागुऔषध नियन्त्रण विभाग गठन गर्ने निर्णयसमेत गरेको छ। नयाँ विभागको नेतृत्व सहसचिवले गर्नेछन्। यसअघि लागुऔषध नियन्त्रणसम्बन्धी काम मन्त्रालयअन्तर्गत शाखाबाट हुँदै आएको थियो।
नयाँ संगठन संरचनाअनुसार मन्त्रालयका केही शाखा हटाइएका छन्। विभूषण शाखा र शान्ति प्रवर्द्धन शाखा पनि खारेज गरिएको मन्त्रालयले जनाएको छ।
उपसचिवको दरबन्दी थप
नयाँ ओएन्डएमअनुसार मन्त्रालयले ६ जना उपसचिवको दरबन्दी थप गरेको छ। यसअघि शाखा अधिकृतबाट सञ्चालन हुँदै आएका केही कार्यालयमा अब उपसचिवको नेतृत्व रहनेछ।
स्याङ्जाको वालिङ र महोत्तरीको बर्दिबास इलाका प्रशासन कार्यालयमा पनि उपसचिवको दरबन्दी कायम गरिएको छ।
चार कारागारमा उपसचिव प्रमुख
मन्त्रालयले झापा, मोरङ, कास्की र बाँकेका कारागारमा पनि उपसचिवस्तरीय प्रमुखको दरबन्दी कायम गरेको छ।
त्यस्तै, नयाँ संगठन संरचनाअनुसार ४६ जना शाखा अधिकृतको दरबन्दी थप गरिएको प्रवक्ता काफ्लेले जानकारी दिए।
Originally published on abcnews.com.np.
प्रतिक्रिया दिनुहोस्