काठमाडौं । अमेरिकी राष्ट्रपति डोनाल्ड ट्रम्पले इरानसँग जोडिएको सम्भावित हत्याको खतराका कारण गत महिना टर्कीबाट बेलायत जाने क्रममा गोप्य रूपमा विमान परिवर्तन गरेको बताएका छन् । सुरक्षाको कारण देखाउँदै अमेरिकी सिक्रेट सर्भिस र सेनाको सल्लाहमा आफूलाई ‘एयर फोर्स वन’बाट अर्को सैन्य विमानमा सारिएको उनले बताएका हुन् ।

मिडिया रिपोर्टअनुसार ट्रम्पलाई क्याटरिङ ट्रकमार्फत अर्को सैन्य विमानमा सारिएको थियो । ट्रम्पले आफू सवार विमानको पहिचान खुलेमा आक्रमणकारीले त्यही विमानलाई निशाना बनाउन सक्ने जोखिम रहेको बताएका छन् ।

ह्वाइट हाउसले त्यसबेला ट्रम्प ‘एयर फोर्स वन’बाट बेलायततर्फ गएको जनाएको थियो । तर पछि उनी अर्को विमानमा सवार भएको तथ्य सार्वजनिक भएपछि उक्त सुरक्षा अभियानबारे खुलासा भएको हो ।

घटनापछि ‘एयर फोर्स वन’मै रहेका पत्रकार तथा ह्वाइट हाउसका कर्मचारीलाई राष्ट्रपतिको सुरक्षा योजनाबारे पर्याप्त जानकारी दिइएको थियो कि थिएन भन्ने प्रश्नसमेत उठेको छ । ट्रम्प पहिलोपटक कतारले उपहार दिएको नयाँ विमान प्रयोग गरेर विदेश भ्रमणमा निस्किएका बेला यो घटना भएको थियो ।

Originally published on abcnews.com.np.