काठमाडौं । अमेरिकी राष्ट्रपति डोनाल्ड ट्रम्पले इरानमाथि विश्वास गर्न नसकिने बताएका छन्। उनले इरानले अमेरिकासँग पटकपटक झुट बोलेको आरोप लगाउँदै होर्मुज जलमार्गमा अमेरिकाको पूर्ण नियन्त्रण रहेको दाबी गरेका छन्।

ज्वाइन्ट बेस एन्ड्र्युजमा पत्रकारहरूसँग कुरा गर्दै ट्रम्पले आफू इरानमाथि विश्वास गर्ने अन्तिम व्यक्ति भएको बताएका हुन्। उनले इरानले आफूसँग लगातार झुट बोलेको आरोप लगाए।

ट्रम्पले होर्मुज जलमार्गमा अमेरिकाको पूर्ण नियन्त्रण रहेको दाबी गर्दै उक्त क्षेत्रमा इरानको कुनै नियन्त्रण नरहेको बताएका छन्। उनले इरानले कुनै कदम चाले त्यसको गम्भीर परिणाम भोग्नुपर्ने चेतावनीसमेत दिएका छन्।

“होर्मुज जलमार्गमा हाम्रो पूर्ण नियन्त्रण छ। यो हाम्रो कब्जामा छ,” ट्रम्पले भने। उनले इरानले केही गरे त्यसलाई “ध्वस्त पारिने” चेतावनी दिँदै अमेरिका अहिले “धेरै राम्रो अवस्थामा” रहेको दाबी गरे।

इरानमाथि अमेरिकी दबाब

अमेरिकाले लामो समयदेखि इरानको परमाणु कार्यक्रमलाई लिएर चिन्ता व्यक्त गर्दै आएको छ। इरानले आफ्नो परमाणु कार्यक्रम शान्तिपूर्ण उद्देश्यका लागि भएको बताउँदै आए पनि अमेरिकाले उसको गतिविधि सीमित गर्न विभिन्न दबाब र प्रतिबन्ध लगाउँदै आएको छ।

इरानको तेल निर्यात र होर्मुज जलमार्गसँग सम्बन्धित गतिविधिलाई लिएर अमेरिका र इरानबीचको तनावले विश्वव्यापी ऊर्जा आपूर्तिमा समेत असर पर्न सक्ने चिन्ता रहँदै आएको छ।

Originally published on abcnews.com.np.