काठमाडौं । नाडाका पूर्वअध्यक्ष तथा हिमालय अर्गनाइजेसनका अध्यक्ष ध्रुवबहादुर थापाले नेपालमा सवारीसाधनको आयात तीव्र गतिमा बढे पनि सडक तथा यातायात पूर्वाधार विकास भने सुस्त रहेको बताएका छन्।

बुधबार आयोजित ‘नाइमा मोबिलिटी संवाद’ कार्यक्रममा बोल्दै थापाले सवारीसाधनको संख्या बढ्नु मात्रै समस्या नभएको भन्दै त्यसअनुसार सडक, पार्किङ र ट्राफिक व्यवस्थापनको पूर्वाधार विकास हुन नसक्नु मुख्य चुनौती भएको बताए।

‘हामी सवारीसाधन भित्र्याउन खरायोको गतिमा हिँडे पनि सरकार पूर्वाधार व्यवस्थापनमा कछुवाको गतिमा हिँडिरहेको छ,’ उनले भने।

सडकसँगै ट्राफिक व्यवस्थापन आवश्यक

थापाले आफूहरूले विगतमा भीमफेदीबाट गाडी बोकेर काठमाडौं ल्याउने अवस्थादेखि अहिले प्रविधिमैत्री सवारीसाधन भित्र्याउने अवस्थासम्मको यात्रा गरेको बताए।

सवारीसाधन बिक्री गर्नु मात्रै व्यवसायीको उद्देश्य नभएको भन्दै उनले सवारी क्षेत्रको विकाससँगै सामाजिक उत्तरदायित्व निर्वाह गर्नुपर्ने बताए। सुरक्षित यातायातका लागि गुणस्तरीय सडक पूर्वाधारसँगै प्रभावकारी ट्राफिक व्यवस्थापन आवश्यक रहेको उनको भनाइ थियो।

नियम उल्लंघनमा कडाइ गर्नुपर्ने

ट्राफिक व्यवस्थापन सुधारका लागि प्रभावकारी जरिवाना प्रणाली र नियमको कडाइका साथ कार्यान्वयन गर्नुपर्ने थापाले बताए।

विदेशमा जरिवाना तथा नियम कार्यान्वयनले चालकमा अनुशासन कायम गर्न सहयोग पुगेको उदाहरण दिँदै उनले नेपालमा पनि ट्राफिक नियम उल्लंघन गर्नेलाई प्रभावकारी कारबाही आवश्यक रहेको बताए।

यातायातसम्बन्धी नीति तथा कानुन निर्माण गर्दा व्यवसायी, विज्ञ र अन्य सरोकारवालासँग पर्याप्त छलफल गर्नुपर्ने उनको सुझाव छ। सम्बन्धित पक्षको सुझाव नलिई नीति बनाउँदा कार्यान्वयनमा व्यवहारिक समस्या आउन सक्ने उनले बताए।

पार्किङ र ईभी पूर्वाधारमा जोड

थापाले काठमाडौंको पार्किङ समस्या पनि गम्भीर बन्दै गएको बताए। भृकुटीमण्डपलगायतका क्षेत्रमा पार्किङ व्यवस्थापन चुनौतीपूर्ण रहेको उल्लेख गर्दै बढ्दो सवारीसाधनलाई ध्यानमा राखेर व्यवस्थित पार्किङ पूर्वाधार निर्माण गर्नुपर्नेमा उनले जोड दिए।

विद्युतीय सवारीसाधन (ईभी) को आयात बढिरहेको अवस्थामा त्यसअनुसार आवश्यक चार्जिङ पूर्वाधार, नीति, नियम र स्पष्ट मापदण्ड निर्माण गर्न पनि उनले सरकारको ध्यानाकर्षण गराए।

‘ईभी आयात भइरहेका छन् । तर, त्यसअनुसार आवश्यक पूर्वाधार, नीति–नियम र स्पष्ट मापदण्ड निर्माणमा पनि सरकारले ध्यान दिनुपर्छ,’ थापाले भने।

उनले नेपाललाई कुनै क्षेत्रको ‘डम्पिङ साइट’ बन्न नदिन पनि सरकार र सरोकारवाला सचेत हुनुपर्ने बताए।

आयात र पूर्वाधारबीच सन्तुलन आवश्यक

सवारीसाधनको आयात र पूर्वाधार विकासबीच सन्तुलन कायम गर्न नसके आगामी दिनमा ट्राफिक व्यवस्थापन, पार्किङ र सडक सुरक्षाको समस्या थप जटिल बन्न सक्ने थापाको चेतावनी छ।

उनका अनुसार सवारीसाधनको संख्या बढ्दै जानु स्वाभाविक भए पनि त्यसलाई धान्ने पूर्वाधार विकासमा समान गतिमा काम गर्न नसकिए मोबिलिटी क्षेत्रको विस्तारले उल्टै सहरी व्यवस्थापनमा ठूलो चुनौती थप्न सक्छ।

Originally published on abcnews.com.np.