धनगढी । सुदूरपश्चिम प्रदेशका मुख्यमन्त्री कमल बहादुर शाहले आज प्रदेशसभालाई सम्बोधन गर्दै राजीनामा घोषणा गर्ने तयारी गरेका छन्। सत्ता गठबन्धनमा रहेको नेकपा एमालेले समर्थन फिर्ता लिएपछि अल्पमतमा परेका शाहका लागि विश्वासको मत लिनुपर्ने वा पदबाट राजीनामा दिनुपर्ने ३० दिनको समयसीमाको आज अन्तिम दिन हो।

मुख्यमन्त्री शाहले प्रदेशसभा बैठक आह्वान गर्न बुधबार सभामुख भीम भण्डारीलाई पत्र पठाएका थिए। त्यसपछि बसेको कार्यव्यवस्था परामर्श समितिको बैठकले आज साँझ ५ बजे प्रदेशसभा बैठक बोलाउने निर्णय गरेको छ। उक्त बैठकमा मुख्यमन्त्री शाहले सम्बोधन गरेर राजीनामा घोषणा गर्ने तयारी गरेको एक मन्त्रीले जानकारी दिएका छन्।

५३ सदस्यीय सुदूरपश्चिम प्रदेशसभामा सरकार जोगाउन २७ सांसदको समर्थन आवश्यक पर्छ। हाल मुख्यमन्त्री शाहको पक्षमा नेपाली कांग्रेसका १८ सांसद छन्। तीमध्ये प्रकाश देउवा भने अमेरिकामा रहेकाले प्रदेशसभामा उपस्थित छैनन्। कांग्रेसका सबै सांसदको समर्थन भए पनि सरकार जोगाउन आवश्यक बहुमत पुग्दैन। शाहलाई थप १० सांसदको समर्थन आवश्यक पर्ने अवस्था छ।

यसअघि मुख्यमन्त्री शाहले विश्वासको मत जुटाउने प्रयास गरे पनि सत्ता समीकरणका कारण आवश्यक समर्थन प्राप्त हुने सम्भावना कमजोर बनेको कांग्रेस नेताहरूले बताएका छन्।

यसैबीच नेपाली कांग्रेस संसदीय दलको बैठक आज दिउँसो ३ बजे बोलाइएको छ। यसअघि बसेको बैठकमा मुख्यमन्त्रीको आगामी कदमबारे छलफल भएको थियो। केही सांसदले विश्वासको मत प्राप्त गर्ने सम्भावना नरहेकाले राजीनामा दिन सुझाव दिएका छन्।

कांग्रेसका एक सांसदका अनुसार विश्वासको मत लिनका लागि प्रदेशसभा बैठक बोलाइए पनि आवश्यक संख्या जुट्ने अवस्था नदेखिएपछि मुख्यमन्त्रीलाई राजीनामा दिन सुझाव दिइएको हो। संसदीय दलको आजको बैठकबाट यसबारे औपचारिक निर्णय हुने बताइएको छ।

कांग्रेसका केही सांसद बुधबार पूर्वप्रधानमन्त्री एवं कांग्रेसका निवर्तमान सभापति शेरबहादुर देउवालाई स्वागत गर्न काठमाडौं पुगेका थिए। तर मुख्यमन्त्री शाहले काठमाडौंमा रहेका सांसदहरूलाई तत्काल धनगढी फर्किन आग्रह गरेपछि उनीहरू सुदूरपश्चिम फर्किएका छन्।

कांग्रेस सांसद मेघराज खड्काले आफूहरू कैलाली फर्किरहेको जानकारी दिएका छन्।

काठमाडौं फर्किएका सांसदसमेत सहभागी हुने आज दिउँसो ३ बजेको संसदीय दलको बैठकले मुख्यमन्त्रीको आगामी कदमबारे अन्तिम निर्णय गर्नेछ। स्रोतका अनुसार आफ्नै दलका सांसदको संख्या पर्याप्त नरहेको र अन्य दलबाट आवश्यक समर्थन जुट्ने सम्भावना न्यून रहेकाले शाहले विश्वासको मतको सामना गर्नुभन्दा राजीनामा दिने विकल्प रोज्ने सम्भावना बढेको छ।

साँझ ५ बजे बस्ने प्रदेशसभा बैठकमा मुख्यमन्त्री शाहले आफ्नो कार्यकाल र समसामयिक राजनीतिक परिस्थितिबारे सम्बोधन गर्ने तथा त्यसपछि राजीनामाको घोषणा गर्ने तयारी रहेको एक मन्त्रीले बताएका छन्।

सुदूरपश्चिममा मुख्यमन्त्री शाहको राजीनामा आएपछि नयाँ सरकार गठनका लागि दलहरूबीच पुनः सत्ता समीकरणको प्रक्रिया सुरु हुनेछ। प्रदेशसभामा कुनै पनि दलको स्पष्ट बहुमत नरहेको अवस्थामा नयाँ सरकार गठनका लागि कांग्रेसबाहेकका दलहरूबीचको समीकरण निर्णायक बन्ने देखिएको छ।

Originally published on abcnews.com.np.