रोल्पा । थबाङ गाउँपालिका–५ बोटलबारा क्षेत्रमा गएराति गएको पहिरोमा परी १० जना बेपत्ता भएका छन्। जिल्ला प्रहरी कार्यालय रोल्पाका अनुसार बेपत्ता भएकाहरूको खोजी तथा उद्धार कार्य जारी छ।

पहिरोले घर तथा गोठ पुरिँदा दुई जनाको मृत्यु भएको छ भने दुई जना घाइते भएका छन्। प्रारम्भिक विवरणअनुसार पहिरोमा परेका छवटा घरमा रहेका १० जना सम्पर्कविहीन भएका हुन्।

घटनास्थल रोल्पा र बागलुङ जिल्लाको सीमा क्षेत्रनजिक पर्छ। जिल्ला सदरमुकामबाट घटनास्थल करिब २१ कोश टाढा रहेकाले उद्धार तथा खोजी कार्यमा कठिनाइ भइरहेको बताइएको छ।

घटनाको जानकारी पाएलगत्तै गएराति नै प्रहरी टोली घटनास्थलतर्फ परिचालन गरिएको थियो। आज बिहानदेखि प्रहरीको संयुक्त टोली र स्थानीयवासीले बेपत्ता व्यक्तिहरूको खोजी गरिरहेका छन्।

प्रमुख जिल्ला अधिकारी गङ्गाबहादुर क्षेत्रीका अनुसार जिल्लास्थित सुरक्षा निकायका प्रमुखहरू घटनास्थलमा पुगेर बेपत्ताको खोजी तथा उद्धार कार्यलाई प्रभावकारी बनाउन निर्देशन दिएका छन्।

प्रहरी तथा स्थानीयवासीले पहिरो प्रभावित क्षेत्रमा जोखिमलाई ध्यानमा राख्दै खोजी कार्य जारी राखेका छन्।

Originally published on abcnews.com.np.