पोखरा । अविरल वर्षापछि मोदीखोलामा आएको बाढीले कास्कीको अन्नपूर्ण गाउँपालिका–५ हाइजुङस्थित अन्नपूर्ण मन्दिर र बेलीब्रिज बगाएको छ। बाढीका कारण मन्दिरका पुजारीसहित तीन जना खोलाको बीचमा फसेका छन्।

प्रहरीका अनुसार बिहीबार राति परेको अविरल वर्षापछि मोदीखोलामा आएको बाढीका कारण उनीहरू खोलाबीचको सानो भग्नावशेषमा फसेका हुन्। प्रहरीचौकी नयाँपुलका प्रहरी सहायक निरीक्षक रमेश अधिकारीको नेतृत्वमा डोरीको सहायताले उनीहरूको उद्धार प्रयास भइरहेको छ।

तीन जना बाढीमा फसेको खबर पाएपछि शुक्रबार बिहान करिब १ः३० बजे अधिकारीको कमान्डमा चार जना प्रहरीको टोली घटनास्थलतर्फ परिचालन गरिएको थियो।

त्यस्तै, सशस्त्र प्रहरी बल नेपाल नं. २४ कालिका गण, कास्कीबाट सशस्त्र प्रहरी निरीक्षक शरणबहादुर खड्काको कमान्डमा १३ सदस्यीय विपद् व्यवस्थापन टोलीसमेत उद्धारका लागि खटाइएको छ।

उच्च बहावका कारण उद्धारमा कठिनाइ

कास्की प्रहरीका निमित्त प्रमुख डीएसपी वीरेन्द्रकुमार पासवानका अनुसार निरन्तर वर्षाका कारण मोदीखोलाको पानीको बहाव अत्यधिक बढेकाले उद्धारमा कठिनाइ भइरहेको छ।

उहाँका अनुसार उद्धार टोलीले जोखिमका बाबजुद फसेका तीनै जनालाई सकेसम्म चाँडो सुरक्षित स्थानमा ल्याउने प्रयास गरिरहेको छ।

Originally published on abcnews.com.np.