काठमाडौं । इरानसँग जारी सैन्य तनावबीच अमेरिकी नौसेनाले मध्यपूर्वमा लामो समयदेखि तैनाथ विमानवाहक युद्धपोत **‘युएसएस अब्राहम लिंकन’**को स्थानमा ‘युएसएस जर्ज वासिङ्टन’ परिचालन गर्ने तयारी थालेको छ। वाल स्ट्रिट जर्नलले यसबारे जानकारी दिएको हो।

‘युएसएस अब्राहम लिंकन’ दुई सय दिनभन्दा लामो समय समुद्रमै तैनाथ रहँदा त्यसमा कार्यरत करिब ५ हजार अमेरिकी नौसैनिक तथा मरिन्समा मानसिक तनाव, थकान र डिप्रेसन बढेको भन्दै परिवार तथा अमेरिकी सांसदहरूले चिन्ता व्यक्त गरेका छन्।

तर पेन्टागन तथा अमेरिकी नौसेनाका अधिकारीहरूले ‘लिंकन’लाई फिर्ता गर्ने तयारी पूर्वनिर्धारित रोटेसन प्रक्रियाकै हिस्सा भएको बताएका छन्।

‘जर्ज वासिङ्टन’ मध्यपूर्वतर्फ

परमाणु ऊर्जाबाट सञ्चालित विमानवाहक युद्धपोत युएसएस जर्ज वासिङ्टन हालै भियतनामको दा नाङबाट प्रस्थान गरी सिंगापुर र मलक्का जलडमरूमध्य हुँदै हिन्द महासागरतर्फ अघि बढेको बताइएको छ।

अमेरिकी सैन्य गतिविधिबारे जानकार अधिकारीहरूका अनुसार उक्त स्ट्राइक ग्रुप मध्यपूर्व पुगेपछि होर्मुज जलडमरूमध्य तथा आसपासका क्षेत्रमा अमेरिकी नौसैनिक उपस्थितिको जिम्मेवारी सम्हाल्नेछ।

गत वर्ष नोभेम्बर २१ मा अमेरिकाको सान डिएगोबाट प्रशान्त महासागरका लागि प्रस्थान गरेको ‘अब्राहम लिंकन’लाई फेब्रुअरी २८ मा इरानसँग युद्ध सुरु भएपछि अचानक मध्यपूर्वतर्फ पठाइएको थियो। त्यसयता युद्धपोत निरन्तर तैनाथ रहँदै आएको हो।

चालक दलको मानसिक स्वास्थ्यबारे चिन्ता

दुई सय दिनभन्दा बढी समय समुद्रमै रहनुपर्दा चालक दलका सदस्यहरूको मानसिक स्वास्थ्यमा गम्भीर असर परेको दाबी अमेरिकी सांसद तथा नौसैनिकका परिवारहरूले गरेका छन्।

केही नौसैनिकमा आत्महत्याका विचार देखिएको र केहीले समुद्रमा फाल हान्ने प्रयाससमेत गरेको परिवारजनले दाबी गरेका छन्।

तर अमेरिकी रक्षा मन्त्री पिट हेगसेथले यस्ता दाबीलाई झुटा र अतिरञ्जित बताएका छन्। अमेरिकी नौसेनाले पनि जहाजमा आत्महत्याका घटनामा असामान्य वृद्धि नभएको दाबी गर्दै नौसैनिकका लागि काउन्सिलर, पादरी, स्वच्छ पानी तथा स्वस्थ खाना उपलब्ध रहेको जनाएको छ।

आपूर्ति व्यवस्थामा समस्या

इरानसँगको तनावका कारण परम्परागत आपूर्ति केन्द्र प्रभावित हुँदा खाना, सरसफाइका सामग्री तथा चिठ्ठीपत्र वितरणमा केही ढिलाइ भएको अमेरिकी नौसेनाले स्वीकार गरेको छ।

नौसेनाले आपूर्ति व्यवस्थामा देखिएको समस्या गम्भीरतापूर्वक लिइएको र त्यसको समाधानका लागि आवश्यक कदम चालिरहेको जनाएको छ।

Originally published on abcnews.com.np.