काठमाडौँ । नेपाली कांग्रेसका नेता डा. शशांक कोइरालाले बालेन्द्र शाह नेतृत्वको वर्तमान सरकारले बहुमतको समर्थन पाए पनि अहिलेसम्म कुनै ठोस र जनपक्षीय काम गर्न नसकेको टिप्पणी गरेका छन्।

शनिबार काठमाडौँमा जारी कांग्रेस संस्थापनइतर पक्षको राष्ट्रिय भेलाका क्रममा सञ्चारकर्मीसँग कुरा गर्दै कोइरालाले सरकारको कार्यशैलीप्रति असन्तुष्टि जनाएका हुन्।

उनले वर्तमान सरकारलाई ‘साधारण’ तथा ‘कामचलाउ’ जस्तो देखिएको टिप्पणी गर्दै नयाँ नीति तथा कार्यक्रममार्फत जनताले अनुभूति गर्ने गरी काम गर्न नसकेको बताए।

“यो मलाई लाग्छ, साधारण सरकार हो। उनीहरूको बहुमत त छ, तर कुनै ठोस, कुनै राम्रो काम गरेको मलाई लाग्दैन,” कोइरालाले भने।

उनका अनुसार सरकारले अहिलेसम्म कुनै नयाँ र प्रभावकारी नीति अघि सार्न सकेको छैन। “नयाँ कुनै नीतिहरू त ल्याएको छैन उनीहरूले। खाली यो कामचलाउ सरकार भनौँ न,” उनले भने।

पाँच वर्ष टिक्नेमा पनि प्रश्न

पत्रकारहरूले बालेन्द्र शाह नेतृत्वको सरकार पाँच वर्षसम्म टिक्ने सम्भावना कति छ भन्ने प्रश्न गर्दा कोइरालाले सरकारको स्थायित्वबारे आशंका व्यक्त गरे।

मध्यावधि निर्वाचनको सम्भावनाबारे सोधिएको प्रश्नमा उनले छोटो जवाफ दिँदै भने, “सम्भावना त किन रहँदैन, भइहाल्छ नि।”

उनको यो भनाइले बहुमतसहित गठन भएको वर्तमान सरकारको स्थायित्वमाथि कांग्रेसभित्रैबाट प्रश्न उठ्न थालेको संकेत गरेको छ।

कांग्रेस इतर पक्षको राष्ट्रिय भेला

डा. कोइरालाको नेतृत्वमा कांग्रेस संस्थापनइतर पक्षको राष्ट्रिय भेला काठमाडौँमा शुक्रबारदेखि जारी छ। आइतबारसम्म चल्ने भेलामा पार्टीभित्रका असन्तुष्ट नेता तथा कार्यकर्ताको सहभागिता छ।

भेलामा कांग्रेसको वर्तमान अवस्था, पछिल्लो राजनीतिक घटनाक्रम, पार्टी पुनर्निर्माण, नेतृत्व, महाधिवेशन तथा आगामी राजनीतिक कार्यदिशाबारे विभिन्न प्रतिवेदन र प्रस्तावमाथि छलफल भइरहेको छ।

भेलाले कांग्रेसलाई संस्थागत रूपमा बलियो बनाउने तथा आगामी दिनको राजनीतिक, आर्थिक र सामाजिक कार्यदिशाबारे धारणा तय गर्ने बताइएको छ।

Originally published on abcnews.com.np.