मकवानपुर । मकवानपुरको भीमफेदी गाउँपालिका–६ जुरीखेतमा उच्च अदालत वीरगञ्जका मुख्य न्यायाधीशसहित ६ जना सवार स्कारपियो दुर्घटनामा परेको छ।

मंगलबार बिहान करिब ७ बजे काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको स्कारपियो अनियन्त्रित भई सडकबाट करिब ५० देखि ६० मिटर तल खोल्सामा खसेको प्रहरीले जनाएको छ।

दुर्घटनामा स्कारपियोमा सवार दुई महिला र चार पुरुष घाइते भएका छन्। प्रहरीका अनुसार घाइतेमध्ये एक महिलाको अवस्था गम्भीर छ भने अन्य पाँच जनाको अवस्था मध्यम रहेको छ।

दुर्घटनाको सूचना प्राप्त भएपछि इलाका प्रहरी कार्यालय भीमफेदीबाट ट्राफिक प्रहरीसहित सात जनाको टोली घटनास्थलमा पुगेको थियो। प्रहरीले घाइतेहरूको उद्धार गरी उपचारका लागि भीमफेदी अस्पताल पठाएको जनाएको छ।

घाइतेहरूको विस्तृत परिचय भने खुल्न बाँकी रहेको प्रहरीले जनाएको छ। जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्री नेतृत्वको टोलीसमेत घटनास्थलमा पुगेको छ।

गम्भीर घाइते महिलालाई थप उपचारका लागि अन्य अस्पतालमा रेफर गर्ने तयारी भइरहेको प्रहरीले जनाएको छ। अन्य पाँच जनाको अवस्था स्थिर रहेको र उनीहरूको उपचार भइरहेको बताइएको छ।

दुर्घटनामा परेको स्कारपियो घटनास्थलमै रहे पनि सडकमा यातायात भने नियमित रूपमा सञ्चालन भइरहेको प्रहरीले जनाएको छ। दुर्घटना के कारणले भयो भन्नेबारे प्रहरीले अनुसन्धान अघि बढाएको छ।

Originally published on abcnews.com.np.