विराटनगर । केन्द्रमा सत्ता समीकरण फेरिएसँगै कोसी प्रदेशमा पनि मन्त्रिमण्डल विस्तार भएको छ। मुख्यमन्त्री हिक्मत कार्कीले नेकपाका चार सांसदलाई मन्त्री र एक जनालाई राज्यमन्त्री नियुक्त गरेका हुन्।

नवनियुक्त मन्त्रीहरूमा खिनु लङ्वा लिम्बू पर्यटन, वन तथा वातावरण, जीवन आचार्य भौतिक पूर्वाधार विकास, गोम्बू शेर्पा आन्तरिक मामिला तथा कानुन र गीता तिम्सिना सामाजिक विकासमन्त्री बनेका छन्। सपना दर्जी राज्यमन्त्री नियुक्त भएकी छन्।

मन्त्रिमण्डल विस्तारसँगै कोसीमा एमाले र नेकपाको संयुक्त सरकार बनेको छ भने कांग्रेस प्रमुख प्रतिपक्षीको बेञ्चमा पुगेको छ।

प्रदेशसभाको दोस्रो निर्वाचनपछि कोसीमा पटक–पटक सरकार परिवर्तन हुँदै आएको छ। करिब चार वर्षको अवधिमा मुख्यमन्त्री मात्रै ६ पटक फेरिएका छन्। यही अवधिमा प्रदेशसभाका ४३ सांसद मन्त्री बनेका छन्।

प्रदेशमा सरकार फेरबदलसँगै मन्त्रीहरूको जिम्मेवारीसमेत पटक–पटक परिवर्तन हुँदै आएको छ। कुनै पनि मन्त्रीले डेढ वर्षभन्दा लामो समय एउटै जिम्मेवारीमा रहेर काम गर्न नपाएको देखिन्छ।

२०७९ पुस २४ गते एमालेका हिक्मत कार्की पहिलोपटक मुख्यमन्त्री नियुक्त भएपछि सुरु भएको सरकार परिवर्तनको क्रम केन्द्रको सत्ता समीकरणसँगै पटक–पटक दोहोरिएको हो। कांग्रेस, एमाले, माओवादी, जसपा र राप्रपाबीचको बदलिँदो समीकरणले प्रदेश सरकारलाई समेत प्रभावित गर्दै आएको छ।

यसपटक केन्द्रमा कांग्रेससँगको गठबन्धन टुटेपछि एमाले र नेकपाबीच सहकार्य भएको हो। त्यसको प्रभावस्वरूप कोसीमा पनि एमाले नेतृत्वको सरकारमा नेकपा सहभागी भएको हो।

लगातारको सत्ता फेरबदलका कारण कोसी प्रदेशमा सरकारको स्थायित्व र मन्त्रीहरूको कार्यसम्पादनमाथि प्रश्न उठ्दै आएको छ। आगामी मंसिरमा प्रदेशसभाको कार्यकाल चार वर्ष पुग्दै गर्दा ९३ सदस्यीय प्रदेशसभाका झन्डै आधा सांसद मन्त्री बनिसकेका छन्।

Originally published on abcnews.com.np.