समाचार

काठमाडौँ । प्रमुख प्रतिपक्षी दल नेपाली कांग्रेसका सांसद नरेन्द्रकुमार केरुङले सरकार जनसरोकारका विषयमा संवेदनशील नभएको आरोप लगाउँदै अधिनायकवादतर्फ उन्मुख भएको टिप्पणी गरेका छन्।

मंगलबार बसेको प्रतिनिधिसभाको बैठकमा विशेष समय लिएर बोल्दै सांसद केरुङले देशभर भइरहेको प्राकृतिक विपद्, प्रेस तथा अभिव्यक्ति स्वतन्त्रतामाथिको हस्तक्षेप र सरकारको कार्यशैलीप्रति आपत्ति जनाएका हुन्।

उनका अनुसार वैशाखयता चार महिनाको अवधिमा देशभर ४ हजार ६८१ विपद्का घटना भएका छन्। ती घटनामा २४७ जनाको मृत्यु, १५ जना बेपत्ता र १ हजार ४६३ जना घाइते भएका छन्। विपद्बाट ५ हजार ७०९ परिवार प्रत्यक्ष प्रभावित भएको उनले सदनलाई जानकारी दिए।

जाजरकोट, बाजुरा, रोल्पालगायत जिल्लामा बाढी र पहिरोका कारण ठूलो जनधनको क्षति भइरहँदा पनि सरकार गम्भीर नदेखिएको उनको आरोप थियो।

‘नागरिकले ज्यान गुमाइरहेका छन्, घरबस्ती बगिरहेका छन् तर सरकार रोम जलिरहँदा निरोले बाँसुरी बजाएझैँ गैरजिम्मेवार बनेको छ,’ सांसद केरुङले भने।

उनले सरकार विपद् व्यवस्थापन र नागरिकको सुरक्षामा केन्द्रित हुनुपर्ने समयमा सत्ता खिचातानी तथा सचिवालयका आन्तरिक काममा व्यस्त रहेको आरोप लगाए।

सांसद केरुङले सुकुम्वासी बस्तीको व्यवस्थापनमा समेत राज्य गम्भीर नभएको दाबी गरे। भक्तपुरको होल्डिङ सेन्टरमा हिरा मिजार दुसाधले आत्महत्या गरेको घटनालाई उदाहरण दिँदै उनले सरकारको संवेदनहीनता देखिएको बताए।

त्यस्तै, प्रेस तथा अभिव्यक्ति स्वतन्त्रतामाथि सरकारबाट प्रहार भइरहेको आरोप पनि उनले लगाए। पत्रकारलाई धम्की दिने, सिंहदरबार प्रवेशमा कडाइ गर्ने तथा सञ्चार गृहमा तोडफोड गर्ने जस्ता गतिविधिले लोकतान्त्रिक व्यवस्थामाथि प्रश्न उठाएको उनको भनाइ थियो।

सांसद केरुङले प्राकृतिक विपद्को जोखिम बढिरहेका बेला सरकारले तत्काल उद्धार, राहत तथा पुनर्स्थापनालाई प्राथमिकता दिनुपर्ने र नागरिकको जीवनरक्षाका लागि प्रभावकारी कदम चाल्नुपर्ने माग गरेका छन्।

Originally published on abcnews.com.np.