मंगलबारको बैठकमा बोल्दै सांसद संग्रौलाले वर्तमान सरकारले भ्रष्टाचार, बेथिति, अनियमितता र ‘गुन्डाराज’को क्यान्सरबाट देशलाई मुक्त गराउने दाबी गरिन्।

उनले विगत ३५ वर्षदेखिको शासन व्यवस्थाकै कारण गत भदौमा ‘जेनजी’ आन्दोलन भएको बताइन्। विगतका सरकारले चलाएको गोलीबाट सिंहदरबार अगाडि ढलेका जेनजी युवाको रगत अझै नसुकेको उनको भनाइ थियो।

संग्रौलाको अभिव्यक्तिपछि विपक्षी बेञ्चमा रहेका सांसदहरू उठेर विरोध जनाएका थिए।

एमाले सांसद सिद्दीकीको प्रतिवाद

संग्रौलाको अभिव्यक्तिको नेकपा (एमाले) की सांसद साजिदा सिद्दीकीले प्रतिवाद गरिन्। उनले रास्वपा नेतृत्वको सरकारले नै ‘गुन्डाराज’ चलाएको आरोप लगाइन्।

प्रतिपक्षले सरकारलाई प्रश्न गर्दा त्यसलाई ‘गुन्डाराज’को संज्ञा दिन नमिल्ने भन्दै उनले आपत्ति जनाइन्। प्रतिपक्ष देश र जनताको पक्षमा उभिएको उनको दाबी थियो।

जेनजी आन्दोलनको विषय उठाउनेले सिरहामा सरकारले चलाएको गोलीकाण्डबारे पनि जवाफ दिनुपर्ने सिद्दीकीले बताइन्।

सिद्दीकीको जवाफपछि सांसद संग्रौलाले पुनः प्रतिवाद गर्दै उनको अभिव्यक्ति संसद्को रेकर्डबाट हटाउन माग गरिन्।