काठमाडौं । शिक्षा तथा खेलकुदमन्त्री सस्मित पोखरेलले सामुदायिक विद्यालयको शैक्षिक गुणस्तर सुधारलाई प्राथमिकतामा राखेर काम गर्ने बताएका छन्।

काठमाडौंका विभिन्न सामुदायिक विद्यालयको स्थलगत अवलोकनपछि मन्त्री पोखरेलले विद्यालयको वास्तविक अवस्था र सरोकारवालाबाट प्राप्त सुझावलाई शिक्षा सुधारसम्बन्धी नीतिमा समेटिने बताए।

उनले सामुदायिक विद्यालयको शैक्षिक गुणस्तर सुधारका लागि आवश्यक नीतिगत तथा व्यावहारिक पहल गरिने उल्लेख गरे।

मन्त्री पोखरेलले राम आधारभूत स्कुल, मदन आश्रित आदर्श मावि, बाल विकास आधारभूत स्कुल र गणेश माविको अवलोकन गरेका छन्। त्यस क्रममा उनले विद्यालयको शैक्षिक अवस्था, पठनपाठन, व्यवस्थापन, पूर्वाधार तथा विद्यार्थीका समस्या र आवश्यकताबारे जानकारी लिए।

अवलोकनका क्रममा उनले प्रधानाध्यापक, शिक्षक तथा विद्यार्थीसँग प्रत्यक्ष अन्तरक्रिया गर्दै विद्यालयमा देखिएका समस्या, चुनौती र सुधारका आवश्यकताबारे जानकारी लिए।

विद्यालयमै पुगेर समस्या बुझ्ने

मन्त्री पोखरेलले विद्यालयको वास्तविक अवस्था प्रत्यक्ष रूपमा बुझेर शिक्षा सुधारका नीति निर्माण गर्न स्थलगत अवलोकन गरिएको बताए। विद्यालयमा देखिएका समस्या तथा शिक्षक र विद्यार्थीका सुझावलाई नीतिगत सुधारमा समेटिने उनको भनाइ छ।

मन्त्रालयका अनुसार सामुदायिक विद्यालयको अवस्था बुझ्न विद्यालयमै पुगेर शिक्षक, विद्यार्थी तथा विद्यालय व्यवस्थापनसँग संवाद गर्ने अभियानलाई आगामी दिनमा पनि निरन्तरता दिइनेछ।

मन्त्री पोखरेलले सोमबारदेखि काठमाडौंका सामुदायिक विद्यालयको स्थलगत अवलोकन सुरु गरेका हुन्। विद्यालयका प्रधानाध्यापक, शिक्षक तथा विद्यार्थीले आफूहरूले भोगिरहेका समस्या र आवश्यकताबारे मन्त्रीसमक्ष जानकारी गराएका थिए।

Originally published on abcnews.com.np.