काठमाडौं । अमेरिकी राष्ट्रपति डोनाल्ड ट्रम्पले इरानसँगको वार्ता तत्काल रोक्न आफ्नो वार्ता टोलीलाई निर्देशन दिएका छन्। इरान सम्झौताका लागि तयार नभएसम्म थप छलफल अघि नबढाउने निर्णय ट्रम्पले गरेको अमेरिकी अधिकारीहरूले बताएका छन्।

अमेरिका र इरानबीच यसअघि सकारात्मक छलफल भइरहेको भए पनि ट्रम्पले थप वार्ता सुरु गर्नुअघि केही समय पर्खिने निर्णय गरेका हुन्। मध्यस्थकर्ताहरू भने अमेरिका–इरान वार्ता पुनः सुरु गराउने प्रयासमा जुटिरहेका छन्।

कतारका अनुसार, वासिङ्टन र तेहरानलाई पुनः वार्ताको टेबलमा ल्याउनुअघि मध्यस्थकर्ताहरू सम्भावित इरान–ओमान सम्झौताको प्रतीक्षामा छन्। एक अमेरिकी अधिकारीले अलजजिरासँग कुरा गर्दै इरानसँग सकारात्मक छलफल भइरहेको भए पनि ट्रम्पले अहिले पर्खिने निर्णय गरेको बताएका छन्।

ती अधिकारीका अनुसार इरानसँगको वार्ताबारे अमेरिकी प्रशासनभित्र कुनै मतभेद वा द्वन्द्व छैन। यद्यपि, ट्रम्पले मंगलबार अमेरिका र इरानबीच हाल कुनै वार्ता भइरहेको वा वार्ता तय भएको जानकारी आफूलाई नभएको बताएका थिए।

होर्मुजलाई लिएर विवाद

यसैबीच, स्ट्रेट अफ होर्मुजलाई लिएर अमेरिका र इरानबीच विवाद चर्किएको छ। ट्रम्पले मंगलबार सामाजिक सञ्जाल ट्रुथ सोसलमा होर्मुज स्ट्रेट र आसपासको समुद्री क्षेत्रलाई समेटिएको नक्सा सार्वजनिक गर्दै त्यसलाई ‘नयाँ अमेरिकी क्षेत्र’का रूपमा प्रस्तुत गरेका थिए।

नक्सामा इरान, ओमान र संयुक्त अरब इमिरेट्सका केही भूभागसमेत समेटिएका थिए। ट्रम्पले होर्मुजमा अमेरिकी नौसैनिक नाकाबन्दी अझै पूर्ण रूपमा लागू रहेको र स्ट्रेट खुला रहेकाले जहाजको आवतजावत जारी रहेको दाबी गरेका छन्।

तर, इरानले ट्रम्पको दाबी अस्वीकार गरेको छ। इरानी उपविदेशमन्त्री काजेम गरीबाबादीले होर्मुज स्ट्रेटलाई अमेरिकाको हिस्सा भन्नु भ्रमपूर्ण भएको बताएका छन्।

इरानी संसद्का सभामुख मोहम्मद बाघेर गालिबाफले अमेरिकाले आफ्ना प्रतिबद्धता पूरा नगरेसम्म इरानले होर्मुज स्ट्रेट नखोल्ने बताएका छन्। यससँगै अमेरिका–इरानबीचको वार्ता र होर्मुज स्ट्रेटको विषय थप पेचिलो बनेको छ।

Originally published on abcnews.com.np.