इस्लामावाद । पाकिस्तानको सर्वोच्च अदालतले पूर्वप्रधानमन्त्री इमरान खानलाई उपचारका लागि शिफा इन्टरनेसनल अस्पतालमा सार्न आदेश दिएको छ। अदालतले आगामी १६ सेप्टेम्बरसम्म उहाँलाई अस्पतालमै राख्न निर्देशन दिएको हो।

इमरान खानलाई अस्पताल भर्ना गर्न माग गर्दै दायर गरिएको निवेदनमाथि सर्वोच्च अदालतको तीन सदस्यीय इजलासले सुनुवाइ गरेको थियो। इजलासको अध्यक्षता न्यायाधीश शाहिद वाहिदले गरेका थिए। इजलासमा न्यायाधीश नइम अख्तर अफगान र इश्तियाक इब्राहिम सदस्य थिए।

अदालतले अदियाला जेलका अधीक्षकलाई अदालतको अवहेलनासम्बन्धी सूचना जारी गर्दै इमरान खानको स्वास्थ्य अवस्थासँग सम्बन्धित सम्पूर्ण मेडिकल रेकर्ड पेस गर्न पनि निर्देशन दिएको छ।

परिवारसँग साप्ताहिक भेटघाटको व्यवस्था गर्न आदेश

सर्वोच्च अदालतले इमरान खानलाई परिवारका सदस्यसँग हरेक साता भेटघाट गर्न दिने व्यवस्था सुनिश्चित गर्न अधिकारीहरूलाई आदेश दिएको छ।

त्यस्तै, उहाँसँग भएका सबै भेटघाटको विस्तृत विवरण तथा उहाँविरुद्ध विचाराधीन सबै मुद्दाको पूर्ण जानकारी अदालतसमक्ष पेस गर्न पनि निर्देशन दिइएको छ।

इमरानका सल्लाहकार जुल्फी बुखारीले सर्वोच्च अदालतको निर्णयको स्वागत गरेका छन्। उनले इमरान खानलाई यसअघि नै अस्पताल पठाइएको भए उहाँको आँखाको अवस्था र समग्र स्वास्थ्यमा थप समस्या आउनबाट जोगाउन सकिने बताएका छन्।

बुखारीले अदालतको आदेशले इमरान खानको स्वास्थ्यमा सुधार ल्याउन सहयोग पुग्ने विश्वास व्यक्त गरेका छन्।

Originally published on abcnews.com.np.