खोटाङ । उत्तरी खोटाङका स्थानीयवासीलाई गुणस्तरीय विद्युत् सेवा उपलब्ध गराउने उद्देश्यले निर्माण सुरु गरिएको बाक्सिला सवस्टेसन १० वर्ष बितिसक्दा पनि पूरा हुन सकेको छैन।

केपिलासगढी गाउँपालिका–४ बाक्सिलास्थित सिम्पानीमा नेपाल विद्युत् प्राधिकरणले विसं २०७३ भदौमा भारतीय ठेकेदार कम्पनी एटुजेड इन्फ्रा इञ्जियरिङ लिमिटेडसँग तीन वर्षभित्र निर्माण सम्पन्न गर्ने सम्झौता गरेको थियो। सम्झौताअनुसार २०७६ सालमै सञ्चालनमा आउनुपर्ने सवस्टेसन अझै अधुरो छ।

निर्माणस्थलमा ल्याइएका विद्युतीय उपकरण खुला चौरमा जथाभावी राखिएकाले कतिपय टुटफुट भएर प्रयोग गर्न नसकिने अवस्थामा पुगेका स्थानीयवासीको भनाइ छ। सवस्टेसनको क्वाटर र कन्ट्रोल बिल्डिङलगायत संरचनासमेत अधुरै छन्।

स्थानीय एमाले नेता माइतीराज राईका अनुसार ठेकेदार कम्पनीले केही संरचनाका पिलर मात्र निर्माण गरेर काम छाडेको छ। बुइपा–बाक्सिला ३३ केभी र ११ केभी प्रसारण लाइनको काम पूरा भए पनि सवस्टेसन निर्माण तथा ट्रान्सफर्मर जडानको काम अघि बढ्न सकेको छैन।

प्राधिकरणलाई पटकपटक आग्रह

सवस्टेसनको बाँकी काम पूरा गर्न नेपाल विद्युत् प्राधिकरणसँग पटकपटक आग्रह गरिए पनि सुनुवाइ नभएको केपिलासगढी गाउँपालिका अध्यक्ष समीर राईले बताए।

उनका अनुसार सवस्टेसनमा जडान गर्न विराटनगरमा खरिद गरेर राखिएका ट्रान्सफर्मरसमेत अझै निर्माणस्थलमा ल्याइएको छैन। निर्माणस्थलमा पहिल्यै ल्याइएका कतिपय उपकरणसमेत लामो समय खुला ठाउँमा राखिँदा प्रयोग गर्न नसकिने अवस्थामा पुगेका छन्।

यो सवस्टेसन केपिलासगढी र ऐसेलुखर्क गाउँपालिका तथा दिक्तेल रुपाकोट मझुवागढी नगरपालिकाको उत्तरी क्षेत्रका उपभोक्तालाई लक्षित गरी निर्माण सुरु गरिएको हो। प्राधिकरणका अनुसार आयोजना सम्पन्न हुँदासम्म यसको लागत करिब ११ करोड रुपैयाँ पुग्ने अनुमान छ।

ठेकेदारको सम्झौता तोडेर नयाँ ठेक्का दिने तयारी

नेपाल विद्युत् प्राधिकरण दिक्तेल वितरण केन्द्रका प्रमुख धनराज विष्टले निर्माणको जिम्मा पाएको ठेकेदार कम्पनीबाट अब काम सम्पन्न हुने अवस्था नरहेको बताए।

उनका अनुसार पटकपटक ठेकेदार परिवर्तन तथा सम्झौता अवधि थपिँदै गए पनि निर्माणले गति लिन सकेको छैन। “सिम्पानीमा निर्माणाधीन सवस्टेसन जसरी भए पनि सञ्चालनमा ल्याउनुपर्ने अवस्था छ,” उनले भने।

बुइपा सवस्टेसनबाट उत्तरी क्षेत्रका स्थानीय तहमा विद्युत् वितरण भइरहेको भए पनि लामो दूरीका कारण सेवा पटकपटक अवरुद्ध हुने गरेको प्राधिकरणको भनाइ छ। त्यसैले काम नगर्ने ठेकेदार कम्पनीसँगको सम्झौता तोडेर नयाँ ठेक्कामार्फत सवस्टेसन निर्माण सम्पन्न गर्ने तयारी भइरहेको विष्टले बताए।

विद्युत् अवरोधबाट उपभोक्ता प्रभावित

बाक्सिला सवस्टेसन सञ्चालनमा नआउँदा उत्तरी खोटाङका उपभोक्ताले नियमित विद्युत् सेवाको समस्या भोग्दै आएका छन्। बुइपा सवस्टेसनबाट लामो दूरी पार गरेर विद्युत् वितरण गर्नुपर्ने भएकाले पानी, हावा तथा चट्याङका बेला विद्युत् सेवा लामो समय अवरुद्ध हुने गरेको उपभोक्ताको गुनासो छ।

स्थानीयवासीका अनुसार निर्माण सामग्री तथा कामदारको भुक्तानीमा समेत समस्या देखिएपछि ठेकेदार कम्पनीले काम छाडेको हो। सम्झौता अवधिमा काम पूरा नभएपछि पटकपटक म्याद थपिएको र म्याद थपिएपछि पनि ठेकेदार सम्पर्कविहीन हुने गरेको बताइएको छ।

ठेकेदारलाई कालोसूचीमा राख्ने तयारी

भारतीय कम्पनी एटुजेड इन्फ्रा इञ्जियरिङ लिमिटेडले नेपालका विभिन्न स्थानमा २२ वटा सवस्टेसन निर्माणको ठेक्का लिएको बताइएको छ। तीमध्ये अधिकांश आयोजनाको काम पूरा नभएको प्राधिकरणको भनाइ छ।

प्राधिकरणले काम अलपत्र पार्ने ठेकेदार कम्पनीलाई कालोसूचीमा राखेर कारबाही गर्ने तयारीसमेत गरेको जनाएको छ। बाक्सिला सवस्टेसनको निर्माण तत्काल अघि बढाएर सञ्चालनमा ल्याउन नसके उत्तरी खोटाङका हजारौँ उपभोक्ताले विद्युत् सेवाको समस्या अझै भोग्नुपर्ने अवस्था देखिएको छ।

Originally published on abcnews.com.np.