नवलपुर, भदौ ४ गते । नवलपुरको अरुणखोला क्षेत्रमा बाघको आक्रमणबाट १९ वटा घरपालुवा जनावर मरेका छन् । मध्यबिन्दु नगरपालिका–१४ द्वारीमा साउन २२ गतेदेखि भदौ ४ गतेसम्म बाघले चार गाईगोरु र १५ बाख्रासहित १९ वटा पशु मारेको जिल्ला प्रहरी कार्यालय नवलपुरले जनाएको छ ।

बाघको आक्रमण बढेपछि चितवन राष्ट्रिय निकुञ्ज, डिभिजन वन कार्यालय नवलपुर र प्रहरीको टोली परिचालन गरिएको छ । बाघको खोजी गरी नियन्त्रणमा लिन डार्ट गर्ने तयारी भइरहेको प्रहरी नायब उपरीक्षक अनिल पण्डितले जानकारी दिए ।

उनका अनुसार बाघ रहेको सम्भावित क्षेत्रमा सीसी क्यामेरा जडान गरेर त्यसको गतिविधि निगरानी गर्ने तयारी भइरहेको छ । त्यसका लागि सम्बन्धित टोलीसमेत परिचालन भइसकेको छ ।

नवलपुरमा पछिल्लो समय बाघले मानिस तथा घरपालुवा जनावरमाथि निरन्तर आक्रमण गर्दै आएको प्रहरीको भनाइ छ । बाघको गतिविधि बढेपछि स्थानीयमा त्राससमेत बढेको छ ।

प्रहरीका अनुसार साउन २२ गतेदेखि भदौ ४ गतेसम्म द्वारी क्षेत्रमा बाघले घरपालुवा जनावरलाई लक्षित गरी आक्रमण गरेको हो । यस अवधिमा चार गाईगोरु र १५ बाख्रा मारिएका छन् ।

Originally published on abcnews.com.np.