हेटौँडा । बागमती प्रदेशमा नेकपा र नेकपा (एमाले) नेतृत्वको सरकारलाई समर्थन गर्ने विषयमा राष्ट्रिय प्रजातन्त्र पार्टी (राप्रपा) भित्र विवाद चर्किएको छ। राप्रपाको केन्द्रीय नेतृत्वदेखि बागमती प्रदेश संसदीय दलको सचिवालयसम्मले सरकारलाई दिइएको समर्थन आधिकारिक नभएको दाबी गरिरहेका छन्। तर, राप्रपाका तीन सांसद भने आजै मन्त्रीको शपथ लिने तयारीमा छन्।

एमालेका किरण थापा नेतृत्वको सरकारमा राप्रपाबाट तीन सांसद सहभागी हुने तयारी भएको हो। बागमती प्रदेश संसदीय दलका उपनेता गिरबहादुर तामाङ (ज्ञानुजंग लामा) को नेतृत्वमा राप्रपा प्रदेश सरकारमा सहभागी हुन लागेको बताइएको छ।

उपनेता लामाका अनुसार उनीसहित राजु विष्ट र राजेन्द्र प्रजापतिले आजै शपथ लिने तयारी गरेका छन्। सहमतिअनुसार ज्ञानुजंग लामा स्वास्थ्य तथा सामाजिक विकासमन्त्री, राजु विष्ट खानेपानी, ऊर्जा तथा सिँचाइमन्त्री र राजेन्द्र प्रजापति उद्योग, पर्यटन, श्रम तथा यातायातमन्त्री बन्नेछन्।

मुख्यमन्त्री तथा मन्त्रिपरिषद्को कार्यालयसहित आठ मन्त्रालय रहेको बागमतीमा एमालेले मुख्यमन्त्रीसहित तीन, नेकपाले दुई र राप्रपाले तीन मन्त्रालय लिने सहमति भएको बताइएको छ।

राप्रपाभित्रै समर्थनलाई लिएर विवाद

बागमती प्रदेशमा नयाँ सरकार गठनका लागि एमालेका किरण थापाले दाबी पेस गरेदेखि नै राप्रपाभित्र विवाद सुरु भएको हो।

राप्रपा केन्द्रले प्रदेश संसदीय दलले दिएको समर्थन अस्वीकार गर्न पत्राचार गरेको छ। त्यस्तै, संसदीय दलकी प्रमुख सचेतक कुमारी तामाङले पनि संसदीय दलको औपचारिक निर्णयबिनै मुख्यमन्त्रीलाई समर्थन गरिएको भन्दै प्रदेश प्रमुखसमक्ष पत्र पठाएकी छन्।

तर, प्रदेश संसदीय दलका उपनेता ज्ञानुजंग लामाले भने राप्रपाभित्र कुनै विवाद नरहेको दाबी गरेका छन्। उनले संविधान, पार्टीको विधान र संसदीय अधिकारअनुसार सरकारमा सहभागी हुने निर्णय गरिएको बताएका छन्।

मन्त्रालय बाँडफाँट

राप्रपाबाट मन्त्री बन्नेहरू :

• ज्ञानुजंग लामा — स्वास्थ्य तथा सामाजिक विकासमन्त्री
• राजु विष्ट — खानेपानी, ऊर्जा तथा सिँचाइमन्त्री
• राजेन्द्र प्रजापति — उद्योग, पर्यटन, श्रम तथा यातायातमन्त्री

राप्रपाको केन्द्रीय नेतृत्वले समर्थनलाई आधिकारिक नमानिरहेको अवस्थामा प्रदेश संसदीय दलका तीन सांसद सरकारमा सहभागी हुन लागेपछि पार्टीभित्रको विवाद थप चर्किने देखिएको छ।

Originally published on abcnews.com.np.