काठमाडौं । चर्को घाम, तातो सडक र त्रिपालको ओतमा लघुवित्त, मिटरब्याज तथा सहकारीपीडित सयौँ नागरिक सात दिनदेखि हरिहरभवन क्षेत्रमा धर्नामा बसेका छन्। घरबार, खेतबारी र सम्पत्ति गुमेको भन्दै उनीहरू न्यायको मागसहित देशका विभिन्न ठाउँबाट काठमाडौं आएका हुन्।

सुनसरीको इनरुवाबाट काठमाडौंसम्म १९ दिन पैदल यात्रा गरेर आइपुगेका पीडितहरू अहिले सडकपेटीमै रात बिताइरहेका छन्। लामो यात्राका कारण कतिपयको पैतालामा घाउ भएको छ भने चप्पलसमेत खिइएर सकिएका छन्।

सडकपेटीमा त्रिपाल र पातलो म्याट्रेस ओछ्याएर बसेका उनीहरूको दैनिकी कष्टकर बनेको छ। प्लास्टिकका पानीका जार, लुगाका पोका र सामान्य भान्साका सामग्री नै उनीहरूको अहिलेको सम्पत्ति बनेका छन्। सडकको छेउमा बाँधिएका त्रिपालमुनि उनीहरूको भान्सा, ओछ्यान र आन्दोलनस्थल बनेको छ।

‘हामी अपराधी होइनौँ, नागरिक हौँ’

पीडितहरूले ‘हाम्रो घर फर्काइदेऊ सरकार’, ‘हामी अपराधी होइनौँ, हामी नागरिक हौँ’ लगायतका नारा लेखिएका प्लेकार्ड बोकेर प्रदर्शन गरिरहेका छन्।

कतिपयले आफ्नो माग सुनुवाइ नभएको भन्दै अन्तर्राष्ट्रिय समुदायको समेत ध्यानाकर्षण गराउन खोजेका छन्। संयुक्त राष्ट्रसंघका महासचिव एन्टोनियो गुटेरेसको तस्बिरसहितका प्लेकार्डसमेत प्रदर्शनमा देखिएका छन्।

पीडितहरूको आरोपमा ऋणको चक्रमा फसेपछि घरजग्गा गुमाउनुपरेको र साहु तथा वित्तीय संस्थाबाट निरन्तर दबाब तथा धम्की खेप्नुपरेको छ।

Originally published on abcnews.com.np.