काठमाडौं । अर्थमन्त्री डा. स्वर्णिम वाग्लेले गाँजाको व्यावसायिक उत्पादन तथा औषधिजन्य प्रयोगका लागि आवश्यक कानुनी व्यवस्था गर्न सरकार सकारात्मक रहेको बताएका छन्।

शुक्रबार राष्ट्रियसभाको बैठकमा सांसदहरूले उठाएका प्रश्नको जवाफ दिँदै मन्त्री वाग्लेले गाँजा खेतीलाई वैधानिकता दिने विषयमा अर्थ मन्त्रालयले आवश्यक सहजीकरण गर्ने प्रतिबद्धता जनाए।

उनले गाँजाको उत्पादन र बजारीकरणलाई केवल आम्दानी, रोजगारी तथा राजस्व संकलनको विषयका रूपमा मात्र हेर्न नहुने बताए। यसको औषधीय उपयोग, नियन्त्रित प्रयोग र सम्भावित आर्थिक लाभलाई समेत ध्यानमा राखेर आवश्यक अध्ययन तथा कानुनी व्यवस्था गर्नुपर्ने उनको भनाइ छ।

वाग्लेका अनुसार विज्ञहरूको अध्ययन र निष्कर्षका आधारमा कानुन बनाएर गाँजा उत्पादन तथा प्रयोगलाई व्यवस्थित गर्न सकिए अर्थ मन्त्रालयले त्यसमा पूर्ण सहयोग गर्नेछ।

गृह मन्त्रालयसँग समन्वय गरिने

अर्थमन्त्री वाग्लेले गाँजा खेतीसम्बन्धी कानुनी व्यवस्था अघि बढाउन गृहमन्त्री तथा गृह मन्त्रालयसँग समन्वय गर्ने बताए। उनले विगतमा विकसित मुलुकहरूको दबाबमा गाँजामाथि प्रतिबन्ध लगाइएको भए पनि अहिले तीमध्ये कतिपय मुलुक नियन्त्रित प्रयोग र वैधानिकतातर्फ अघि बढिरहेको उल्लेख गरे।

उनले नेपालले पनि गाँजाको सम्भावनाबारे सकारात्मक ढंगले अध्ययन गरी आवश्यक कानुनी तथा नीतिगत व्यवस्था गर्नुपर्ने बताए।

गाँजाको व्यावसायिक र औषधिजन्य उपयोगबारे सार्वजनिक बहस भइरहेकाले यस विषयलाई सरकारले प्राथमिकताका साथ अघि बढाउने उनको भनाइ छ।

Originally published on abcnews.com.np.